ကမ္ဘာ့အကြီးမားဆုံး ကားတင်သင်္ဘောကြီး BYD Shenzhen တရုတ်ပြည်တွင် ရေချပြီ

BYD သည် ကမ္ဘာ့အကြီးမားဆုံး ကားတင်သင်္ဘောကြီးကို ရေချလိုက်ပြီဖြစ်သည်။

RoRo (မောင်းတက်၊ မောင်းဆင်း) အမျိုးအစားသင်္ဘော ဖြစ်သည်။

BYD အခြေစိုက်ရာ ရှန်ကျန်းမြို့ကို အစွဲပြုကာ သင်္ဘောကို BYD Shenzhen ဟု အမည်ပေးထားခြင်း ဖြစ်သည်။

BYD Shenzhen ကို ရေချလိုက်သည့်နေရာမှာ ရှန်ဟိုင်းမြို့၏ အနောက်မြောက်ဘက် ၃ နာရီခရီး အကွာတွင် တည်ရှိသော ယန်ကျုံးဆိပ်ကမ်းတွင် ဖြစ်သည်။

BYD Shenzhen သည် ကားအစင်းရေ ၉၂၀၀ အထိ တင်ဆောင်နိုင်သည်ဟု ဆိုသည်။
အလျား ၂၁၉ မီတာ (၇၁၈ ဒသမ ၅ ပေ)၊ ဗျက် ၃၇ ဒသမ ၇ မီတာ (၁၂၃ ဒသမ ၆ ပေ) ရှိပြီး ရေစူးမှာ ၉ မီတာ (၂၉ ဒသမ ၅ ပေ) ဖြစ်သည်။

အမြင့်ဆုံးမြန်နှုန်းအနေဖြင့် တစ်နာရီလျှင် ရေမိုင် ၁၈ ဒသမ ၅ မိုင် (၃၄ ဒသမ ၃ ကီလိုမီတာ) ခုတ်မောင်းနိုင်သည်ဟု ဆိုသည်။

BYD Shenzhen သည် BYD ပိုင် စတုတ္ထမြောက် ကားတင်သင်္ဘောကြီး ဖြစ်သည်။
BYD သည် ၂၀၂၆ ခုနှစ်သို့ အရောက်တွင် ကားတင်သင်္ဘော ၈ စင်းအထိ ထားရှိသွားရန် စီစဉ်ထားသည်။

BYD သည် third-party supplier များကို အားမကိုးဘဲ ကုမ္ပဏီကို vertical integration ချဲ့ထွင်နေသော ကုမ္ပဏီအဖြစ် လူသိများသည်။

ထို့ကြောင့် ကားထုတ်လုပ်မှုသာမက ကားဘက်ထရီများ ထုတ်လုပ်ခြင်း၊ လီသီယမ်သတ္တုတွင်းများ ဝယ်ယူခြင်းတို့အပြင် တရုတ်ပြည်၌ EV အာမခံကုမ္ပဏီ တည်ထောင်ခြင်းတို့အထိ ဖြန့်ကျက်ထားသည်။

(ရေချလိုက်သော BYD Shenzhen သင်္ဘောကြီး။ ဓာတ်ပုံ-CNS)

BYD က ပြောသည်မှာ BYD Shenzhen သည် ကမ္ဘာပေါ်တွင် သဘာဝပတ်ဝန်းကျင်နှင့် သဟဇာတအဖြစ်ဆုံး ကားတင်သင်္ဘောကြီးဖြစ်ကြောင်း ပြောသည်။

BYD Shenzhen တွင် LNG dual-fuel technology ကို အသုံးပြုထားရာ ဓာတ်ငွေ့ဖြင့် မောင်းနိုင်သည့်အပြင် လက်ရှိသင်္ဘောများတွင် အသုံးပြုနေသော လောင်စာဖြင့်လည်း မောင်းနိုင်သည်။

သင်္ဘော မောင်းနှင်လည်ပတ်မှု မြှင့်တင်နိုင်ရေးအတွက် energy-saving device များ တပ်ဆင်ထားသည်။

BYD Shenzhen သည် BYD ထုတ် ဘက်ထရီများ ပထမဆုံး အသုံးပြုထားသည့် သင်္ဘောဖြစ်သည်။

ထိုအကြောင်းကို ကုမ္ပဏီက အသေးစိတ် မပြောသော်လည်း အဆိုပါ ဘက်ထရီစွမ်းအင်ကို သင်္ဘော ရပ်နားထားစဉ် ကာလများအတွင်း အဓိက အသုံးပြုဖွယ် ရှိသည်။
BYD ၏ ပထမဆုံး ကားတင်သင်္ဘောကို ၂၀၂၄ ခုနှစ်၊ ဇန်နဝါရီလတွင် ရေချခဲ့ပြီး BYD Explorer ဟု အမည်ပေးခဲ့သည်။

ယင်းနောက် BYD Changzhou ကို ၂၀၂၄ ခုနှစ်၊ ဒီဇင်ဘာတွင် ရေချခဲ့ပြီး လျှပ်စစ်ကား အစင်းရေ ၅၀၀၀ တင်ဆောင်ကာ ဥရောပသို့ ထွက်ခွာခဲ့သည်။

(BYD Shenzhen တွင် LNG dual-fuel technology ကို အသုံးပြုထားသည်။)

ပြီးခဲ့သော ရက်သတ္တပတ်အတွင်းကလည်း ကားအစင်းရေ ၇၀၀၀ တင်ဆောင်နိုင်သော BYD Hefei ကို လုပ်ငန်းစတင်လည်ပတ်ခဲ့သည်။

Ref: BYD Shenzhen, world’s largest 9,200-car carrier, undocked in China