Tesla က ထုတ်လုပ်မည့် စတီယာရင်, pedal များမပါသော မောင်းသူမဲ့ Robotaxi ကို မကြာမီတွင် ဒေါ်လာ ၃၀,၀၀၀ အောက်ဖြင့် ဝယ်ယူနိုင်တော့မည်ဖြစ်ကြောင်း Elon Musk ထုတ်ဖော်ပြောကြား

Tesla သည် သိပ္ပံဆန်းကြယ်ရုပ်ရှင်များမှ ယာဉ်များအသွင် မှတ်ထင်ရသော Robotaxi ဟု အမည်ပေးထားသည့် မောင်းသူမဲ့ကားကို ပြောခဲ့သည်မှာ နှစ်ပေါင်းအတန်ကြာခဲ့ပြီဖြစ်သည်။

ယခုအခါ အဆိုပါအိပ်မက်မှာ လက်တွေ့အကောင်အထည်ပေါ်လာတော့မည်ဖြစ်ကြောင်း Elon Musk က ပြောကြားလာသည်။

Robotaxi တွင် စတီယာရင်နှင့် pedal များ မပါသည့်အပြင် လူ ၂ ဦးသာ စီးနိုင်သောကား ဖြစ်သည်။

Tesla က အောက်တိုဘာ ၁၀ ရက်နေ့ည၌ ကျင်းပခဲ့သော “We,Robot” အမည်ရှိပွဲတွင် Robotaxi ကို စတင်ချပြလိုက်သည်။

Robotaxi မှာ လျှပ်စစ်ကားဖြစ်ပြီး ဈေးနှုန်း ကန်ဒေါ်လာ ၃၀၀၀၀ အောက်သာ ကျသင့်မည်ဖြစ်ပြီး မောင်းနှင်မှု ကုန်ကျစရိတ်မှာ တစ်မိုင်လျှင် ဆင့် ၂၀ (တစ်ဒေါ်လာ၏ ၅ ပုံ ၁ ပုံ) သာ ဖြစ်သည်။

အဆင့်မြင့်နည်းပညာနှစ်သက်သူများအတွက် Robotaxi လမ်းများပေါ်သို့ ရောက်လာရန် ကြာကြာ စောင့်ရတော့မည်မဟုတ်။

(Tesla ၏ အနာဂတ်ဆန်လှသော Robotaxi တွင် စတီယာရင်၊ pedal များ မပါချေ။ လိုက်ပါမည့်သူ ၂ ဦးအနေဖြင့် ကားပေါ်တွင် ထိုင်၍ လိုက်ပါသွားရုံသာဖြစ်ပြီး ကားမှာ မိမိသွားလိုရာသို့ အလိုအလျောက် မောင်းနှင်ပေးသွားမည်ဖြစ်သည်)

(အောက်တိုဘာ ၁၀ ရက်နေ့ညက ကျင်းပခဲ့သော “We, Robot” အမည်ရှိပွဲတွင် Robotaxi ကို စတင်မိတ်ဆက်ခဲ့သည်။ Tesla ၏ ပထမဆုံး ရာနှုန်းပြည့်အလိုအလျောက်စနစ်သုံး မော်တော်ကားဖြစ်ပြီး အတွင်းပိုင်းတွင် ကြီးမားသော screen တစ်ခုနှင့် ခွက်ထည့်သောနေရာ ၂ ခုသာ ပါသည်)

♦ Tesla ၏ ပထမဆုံးသော ရာနှုန်းပြည့် အလိုအလျောက်မောင်းနှင်စနစ်သုံး မော်တော်ကား

● Robotaxi သည် Tesla ၏ ပထမဆုံး ရာနှုန်းပြည့် အလိုအလျောက်မောင်းနှင်စနစ်သုံး ကားတစ်စီးဖြစ်

● စတီယာရင်၊ Pedal များနှင့် အခြားထိန်းချုပ်စနစ်များ မပါဝင်

● လိုက်ပါမည့်သူများမှာ ကားပေါ်ထိုင်၍သာလိုက်သွားရုံဖြစ်ပြီး မိမိသွားလိုရာရောက်သည်အထိ စောင့်နေရန်သာ ရှိသည်

● ဈေးနှုန်းမှာ ကန်ဒေါ်လာ ၃၀၀၀၀ အောက်သာဖြစ်ပြီး မောင်းနှင်စရိတ် ၁ မိုင်လျှင် ဆင့် ၂၀ သာ ကျသင့်မည်ဖြစ်

● ၂၀၂၆ နှစ်ကုန်ပိုင်း မတိုင်မီ စတင်ရောင်းချပေးနိုင်မည်ဟု Elon Musk က ခန့်မှန်းထား

ဓာတ်ပုံများတွင် တွေ့ရှိရမှုအရ ကားအတွင်းပိုင်း၌ ခွက်ထည့်သည့်နေရာ ၂ ခုနှင့် အခြားသော Tesla မော်ဒယ်များတွင် တွေ့ရလေ့ရှိသော ကြီးမားသည့် screen ကြီးတစ်ခုသာ ပါဝင်သည်ကို တွေ့ရသည်။

Elon Musk က Robotaxi ကို ဟောလိဝုဒ်ရှိ ဇာတ်ခုံစင်မြင့်တစ်ခုပေါ်သို့ မောင်းတက်စေကာ မိတ်ဆက်ချပြခဲ့ခြင်းဖြစ်သည်။

Elon Musk ၏ ပြောပြချက်အရ Robotaxi တွင် အခြားလျှပ်စစ်ကားများကဲ့သို့ အားသွင်းပေါက် မပါဝင်ကြောင်း ပြောသည်။

Robotaxi ကို အားသွင်းစခန်းရှိရာသို့ မောင်းသွားပြီး လျှပ်စစ်အားကို ကြိုးမဲ့စနစ်ဖြင့် သွင်းယူရန်သာဖြစ်ရာ အားသွင်းရန်အတွက် လူတို့၏ အကူအညီ ရယူရန် မလိုအပ်ချေ။

Manual control စနစ်အားလုံး ထည့်သွင်းမထားသောကြောင့် ကားပေါ်တွင် လိုက်ပါမည့်သူ ၂ ဦးအတွက် နေရာပိုမိုရရှိလာမည့်အပြင် သက်တောင့်သက်သာ စီးနင်းနိုင်မည် ဖြစ်သည်။

(Tesla Robotaxi သည် ဈေးနှုန်း ဒေါ်လာ ၃၀၀၀၀ အောက်သာ ကျသင့်မည်ဖြစ်ပြီး မောင်းနှင်စရိတ် တစ်မိုင်လျှင် ဆင့် ၂၀ သာ ကုန်ကျမည် ဖြစ်သည်)

(လိပ်ပြာတောင် တံခါးများမှာ အပေါ်သို့ ဒေါင်လိုက်ဖွင့်ရပြီး နှစ်ယောက်စီးကား ဖြစ်သည်)

Robotaxi ၏ ရည်မှန်းချက်မှာ Uber ကဲ့သို့ အငှားဝန်ဆောင်မှုကားမျိုးဖြစ်ရန် ရည်မှန်းခြင်းဖြစ်သည်။

Robotaxi ၏ အားသာချက်မှာ အလိုအလျောက်မောင်းနှင်စနစ်ဖြစ်သောကြောင့် မိမိအသုံးမပြုချိန်တွင် အခြားသူများကို ဝန်ဆောင်မှုများ ပေးနိုင်မည်ဖြစ်သည်။

တစ်နည်းဆိုရလျှင် သင့်အနေဖြင့် အိပ်ရာထဲတွင် ဘေးကင်းလုံခြုံစွာ အိပ်စက်နေချိန်၌ သင်၏ကားမှာ အလိုအလျောက်မောင်းနှင်ကာ တစ်ညလုံးငွေရှာပေးနေမည် ဖြစ်သည်။

Credit: iMyanmarHouse.com

Credit to Photo

Ref: Inside Tesla's Robotaxi: Elon Musk's driverless cab features NO steering wheel or pedals (dailymail)

Photo Credit-dailymail