ဗြိတိန်တွင် ကမ္ဘာ့လျှပ်စစ်ကားနေ့အား ဂုဏ်ပြုသောအားဖြင့် ယနေ့ (9.9.2024) တစ်ရက်တာလုံး လျှပ်စစ်ကားများ အခမဲ့ အားသွင်းခွင့်ရမည်

ဗြိတိန်တဝန်း၌ ယနေ့ (9.9.2024) တွင် လျှပ်စစ်ကားပိုင်ရှင် သန်းပေါင်းများစွာမှာ အခမဲ့ အားသွင်းခွင့်ရကြမည် ဖြစ်သည်။

လျှပ်စစ်အားသွင်းစခန်းကွန်ရက်ကုမ္ပဏီနှင့် National Trust တို့ ပူးပေါင်းကာ ကားလောကသမိုင်းမှတ်တိုင် တစ်ခုကို ဂုဏ်ပြုကြခြင်း ဖြစ်သည်။

(Raw Charging ကုမ္ပဏီက ဗြိတိန်တဝန်းရှိ လျှပ်စစ်ကားပိုင်ရှင်တို့အား ယနေ့တွင် အခမဲ့ အားသွင်းခွင့် ပေးမည်ဖြစ်သည်။ ဓာတ်ပုံ-AFP)

အားသွင်းဆိုင်များ တည်ထောင်သည့် ကုမ္ပဏီ Raw Charging က စက်တင်ဘာလ ၉ ရက်တွင် ကျရောက် သော ကမ္ဘာ့လျှပ်စစ်ကားနေ့ကို ဂုဏ်ပြုသောအားဖြင့် လျှပ်စစ်ကားပိုင်ရှင်တို့ကို အခမဲ့အားသွင်းခွင့် ပေးခြင်း ဖြစ်သည်။

လျှပ်စစ်ကားပိုင်ရှင်တို့သည် အားလုံးဝမရှိသော အနေအထားမှသည် ၂၄ နာရီလုံး တစ်ပြားတစ်ချပ်မှ ပေးစရာမလိုဘဲ အားသွင်းနိုင်မည် ဖြစ်သည်။

တနင်္လာနေ့ မနက် ၁၂း၀၁ (တနင်္ဂနွေနေ့ည သန်းခေါင်ကျော်) မှစတင်ကာ ည ၁၁း၅၉ အထိ အားသွင်းခ ကောက်ခံမည် မဟုတ်ချေ။

Raw ကုမ္ပဏီ၏ အားသွင်းစက်တိုင်းတွင် အခမဲ့အားသွင်းနိုင်မည်ဖြစ်ပြီး ကမ္ဘာလှည့်ခရီးသည်များ လည်ပတ်ကြရာ အထင်ကရနေရာများရှိ အားသွင်းစက်များတွင်လည်း အားသွင်းနိုင်သည်။

Alton Towers နှင့် Chessington World of Adventures တို့ကဲ့သို့ theme park များရှိ အားသွင်းစက်များအပြင် National Trust ၏ အားသွင်းစက်များတွင်လည်း အားသွင်းနိုင်မည် ဖြစ်သည်။

ထို့အပြင် နိုင်ငံတဝန်းရှိ နာမည်ကြီးအရက်ဆိုင်အချို့တွင်လည်း အားသွင်းစက် ၅၀၀ ကျော်ရှိပြီး ထိုနေရာများတွင်လည်း အခမဲ့ အားသွင်းနိုင်သည်။

Raw ၏ ဝက်ဘ်ဆိုက်တွင်လည်း ဗြိတိန်တဝန်းရှိ အားသွင်းစက်များ တည်နေရာကို ရှာဖွေနိုင်ပြီး သင်နှင့်အနီးဆုံးစက်ကို ရွေးချယ်ကာ အားသွင်းနိုင်သည်။

ChargePoint အမည်ရှိ ဖုန်း App ကို download ရယူ၍လည်း ဗြိတိန်တဝန်းရှိ အားသွင်းစက်များ တည်နေရာကို ရှာဖွေနိုင်သည်။

နှစ်စဉ် ပြည်သူထောင်ပေါင်းများစွာ လျှပ်စစ်ကား ဝယ်ယူလာနေသောကြောင့် လျှပ်စစ်ကား စီးသူများကို ပြန်လည်ပေးဆပ်လိုကြောင်း Raw က ပြောသည်။

မိမိစီးသော EV ၏ ဘက်ထရီသိုလှောင်နိုင်အား ပမာဏအပေါ်မူတည်ပြီး ၃၃ ပေါင်ခန့်အထိ ကုန်ကျစရိတ် သက်သာနိုင်မည့် အခွင့်အလမ်းလည်း ဖြစ်သည်။

Raw ၏ စီအီးအို Jason Simpson က “ကျွန်တော်တို့ဟာ ကမ္ဘာ့လျှပ်စစ်ကားနေ့ အထိမ်းအမှတ်အဖြစ် ဗြိတိန်က EV ပိုင်ရှင်တွေကို ၃ နှစ်ဆက်တိုက် ပြန်လည်ကျေးဇူးဆပ်နိုင်ခဲ့တဲ့ပေါ် ဝမ်းမြောက်မိပါတယ်။ ကာဗွန်ဒိုင်အောက်ဆိုက် ထုတ်လွှတ်မှု လျှော့ချနိုင်ရေးနဲ့ ရေရှည်တည်တံ့နိုင်ရေးတွေမှာ သူတို့ရဲ့ ပူးပေါင်းပါဝင်နေမှုအပေါ် ကျေးဇူးတင်ပါတယ်” ဟု ပြောသည်။

(CarsDB Team မှ ရေးသား ဖော်ပြသည်။)

Credit: CarsDB.com

Ref: FREE RIDE -Millions of drivers will be able to ‘fill up’ for FREE next week… find out if you can take advantage (thesun)     

Photo Credit:  AFP