နယ်သာလန်တက္ကသိုလ် ကျောင်းသားများက ကမ္ဘာ့ပထမဆုံး နေစွမ်းအင်သုံးကားကို မော်ရိုကိုနိုင်ငံနှင့် ဆာဟာရသဲကန္တာရတို့တွင် စမ်းသပ်မောင်းနှင်ရာ ကီလိုမီတာ ၁၀၀၀ မောင်းနှင်နိုင်ခဲ့

ခရီးရှည်ထွက်သည့်ကာလအတွင်း လမ်းတွင်ရပ်ကာ ဆီဖြည့်ရခြင်း (သို့မဟုတ်) အားသွင်းရခြင်းတို့မှာ စိတ်ပျက်ဖွယ်ရာ ရှောင်လွှဲမရသော ဖြစ်ရပ်ဖြစ်သည်။

ယခုအခါ နယ်သာလန်မှ အင်ဂျင်နီယာကျောင်းသားတစ်စုက အဆိုပါဒုက္ခများမှ ကင်းဝေးစေမည့် ကမ္ဘာ့ပထမဆုံး နေစွမ်းအင်သုံး မော်တော်ကားကို တီထွင်ထုတ်လုပ်ကာ စမ်းသပ်ခဲ့ကြသည်။

အဆိုပါကားကို Stella Terra ဟုအမည်ပေးထားပြီး ၂ ယောက်စီး မော်တော်ကား ဖြစ်သည်။

၎င်းတို့အဖွဲ့သည် ထိုကားဖြင့် မော်ရိုကိုနိုင်ငံနှင့် ဆာဟာရသဲကန္တာရတို့တွင် စမ်းသပ်မောင်းနှင်ခဲ့ရာ အားသွင်းစရာမလိုဘဲ နေစွမ်းအင်သက်သက်ဖြင့် ကီလိုမီတာ ၁၀၀၀ (မိုင် ၆၂၀ ) အောင်မြင်စွာ မောင်းနှင်နိုင် ခဲ့ကြသည်။

Stella Terra ကို နယ်သာလန်ရှိ အိုင်ထိုဗန် နည်းပညာတက္ကသိုလ် (Eindhoven University of Technology) မှ ကျောင်းသားများက ဒီဇိုင်းရေးဆွဲထုတ်လုပ်ခဲ့ခြင်းဖြစ်ပြီး ကမ္ဘာ့ပထမဆုံး နေစွမ်းအင်သုံး SUV ဟု သတ်မှတ် ခြင်း ခံရသည်။

ကားအလေးချိန်မှာ ၁ ဒသမ ၂ တန်သာ ရှိပြီး အမြင့်ဆုံးအမြန်နှုန်း တစ်နာရီလျှင် မိုင် ၉၀ (145Kmh) ဖြင့် နေသာသောနေ့များတွင် မိုင် ၄၄၀ ခန့်အထိ မောင်းနှင်နိုင်သည်။

အိုင်ထိုဗန် တက္ကသိုလ်ကျောင်းသားများ ထုတ်လုပ်သော ကားတွင် built-in ဆိုလာပြားများ တပ်ဆင်ထားသည်။

၎င်းတို့သည် Stella Terra ဖြင့် မော်ရိုကိုနိုင်ငံ၏ မြောက်ဘက် ကမ်းရိုးတန်းမှ စတင်ထွက်ခွာကာ Rif တောင်တန်းပေါ်မှ ဖြတ်ကျော်ပြီး ဆာဟာရသဲကန္တာရအတွင်း မောင်းနှင်ခဲ့သည်။

(အိုင်ထိုဗန် နည်းပညာတက္ကသိုလ်မှ ကျောင်းသားများ ထုတ်လုပ်သော ကမ္ဘာ့ပထမဆုံး နေစွမ်းအင်သုံး မော်တော်ကား )

(မောင်းနှင်ခဲ့သည့် ခရီးလမ်းကြောင်း)

တက္ကသိုလ်ကျောင်းသားများ၏ အဖွဲ့ခေါင်းဆောင် Wisse Bos က ပြောသည်မှာ ယခုကား၏ နည်းပညာမှာ ဈေးကွက်တွင် ရှိသော အခြားကားအားလုံးထက် ဆယ်စုနှစ်တစ်ခုစာ ရှေ့ရောက်နေကြောင်း ပြောသည်။

(ကားပေါ်မှ ဆိုလာပြားမှာ အားသွင်းမှုအပြင် နေပူပြင်းသောနေ့တွင် အရိပ်လည်း ရစေနိုင်မည် ဖြစ်သည်။)

ကားကို ပေါ့ပါးစွာ တည်ဆောက်ထားရာ ခရီးဝေးပိုမိုသွားလာနိုင်စေရုံမျှမက သဲအတွင်း ကျွံဝင်ခြင်းကိုလည်း ရှောင်ရှားနိုင်မည် ဖြစ်သည်။

((Stella Terra  ၏ အသေးစိတ်အချက်အလက်များ))

 ♦ နေသာသောနေ့တွင် တစ်ရက်လျှင် မိုင် ၄၄၀ သွားနိုင်မည်ဖြစ်သည်။

♦ အမြင့်ဆုံးမြန်နှုန်း -တစ်နာရီလျှင် မိုင် ၉၀

♦ အလေးချိန်- ၁၂၀၀ ကီလိုဂရမ်

♦ နေမထွက်သောနေ့များအတွက် Lithium-ion ဘက်ထရီ တပ်ဆင်ပေးထားသည်။

♦ ၉၇ ရာခိုင်နှုန်း စွမ်းအင် ထိရောက်မှုရှိသော ဆိုလာအင်ဗာတာများ 

♦ စိတ်ကြိုက်တည်ဆောက်ထားသော Suspension နှင့် Steering စနစ်

♦ ထိုင်ခုံ ၂ လုံးကို အိပ်ယာများအဖြစ် အပြည့်လှဲချနိုင်သည်။

♦ ချက်ပြုတ်ရန်အပြင် လျှပ်စစ်ပစ္စည်းများ အားသွင်းနိုင်ရန် လျှပ်စစ်ဓာတ်အား အလုံအလောက် ထုတ်ပေးသည်။

♦ ဆိုလာပြားကို ဆန့်ထုတ်နိုင်ပြီး လျှပ်စစ်ပိုမိုရရှိရန်နှင့် အရိပ်ရရန် အသုံးပြုနိုင်သည်။

(ကမ္ဘာ့ပထမဆုံး နေစွမ်းအင်သုံး မော်တော်ကား)

(ကားစတီယာရင်နှင့် ပတ်သက်သော ပြဿနာသာ ကြုံခဲ့ရပြီး ကျောင်းသားများက လမ်းတွင် ပြင်ဆင်နိုင်ခဲ့ ကြသည်။)

(အသက် ၂၁ မှ ၂၅ နှစ်ကြားအရွယ်ရှိ ကျောင်းသားများက ထုတ်လုပ်ခဲ့ခြင်း ဖြစ်သည်။)

(CarsDB Team မှ ရေးသား ဖော်ပြသည်။)

Credit: CarsDB.com

Ref:  Talk about a bright idea! World's first solar-powered SUV completes a 620-MILE test drive across Morocco and the Sahara without charging (dailymail)