BYD က ကားတင်သင်္ဘော ၈ စင်းအထိ ဆောက်လုပ်ပြီးစီးခဲ့ရာ တစ်နှစ်လျှင် ကားအစင်းရေ ၁ သန်းအထိ တင်ပို့နိုင်တော့မည်

BYD သည် ကားတင်သင်္ဘော ၈ စင်းအထိ ဆောက်လုပ်ပြီးစီးကာ သင်္ဘောအုပ်စု ဖွဲ့စည်းပိုင်ဆိုင်လာပြီဖြစ်ရာ နှစ်စဉ် ကားအစင်းရေ ၁ သန်းကျော် တင်ပို့နိုင်တော့မည် ဖြစ်သည်။

နောက်ဆုံးဆောက်လုပ်ပြီးစီးသည့် ကားတင်သင်္ဘောမှာ BYD Jinan ဖြစ်ပြီး ပြီးခဲ့သော ရက်သတ္တပတ်က စတင်ရေချခဲ့ကြောင်း BYD က WeChat မှတဆင့် ကြေညာသည်။

ရှန်ကျန်းအခြေစိုက် BYD သည် အဆိုပါသင်္ဘောအုပ်စုကို ၂ နှစ်အတွင်း အပြီးသတ် တည်ဆောက်ခဲ့ခြင်းဖြစ်သည်။

ပထမဆုံးကားတင်သင်္ဘောဖြစ်သော BYD Explorer No.1 ကို ၂၀၂၄ ခုနှစ်၊ ဇန်နဝါရီလတွင် စတင်ရေချခဲ့ခြင်း ဖြစ်သည်။
ကားတင်သင်္ဘောအားလုံးမှာ မောင်းတက်မောင်းဆင်း (RoRo) သင်္ဘောများဖြစ်ပြီး ဘီးတပ်ယာဉ်များ တင်ဆောင်ရန်ထုတ်လုပ်ထားခြင်းဖြစ်ကာ ယာဉ်များမှာ ၎င်းတို့ဘာသာ မောင်းတက်မောင်းဆင်းပြုလုပ်ပြီး ကွန်တန်နာများ အသုံးမပြုချေ။

BYD ၏ သင်္ဘောများမှာ ကားအစင်းရေ ၇၂၀၀ မှ ၉၀၀၀ ကြား တင်ဆောင်နိုင်သည်။

(BYD Shenzhen သင်္ဘောပေါ်သု့ ကားများတင်နေပုံ။)

🟢 BYD ၏ ကားတင်သင်္ဘောများစာရင်း

● BYD Explorer No.1  ● BYD Hefei  ● BYD Changzhou  ● BYD Shenzhen  ● BYD Xi’an  ●BYD Changsha  ●BYD Zhengzhou  ● BYD Jinan

နောက်ဆုံးရေချလိုက်သော Jinan အပါအဝင် သင်္ဘောအားလုံးမှာ BYD ၏ မော်တော်ကားများကို ကမ္ဘာတဝန်း ပို့ဆောင်ပေးလျက်ရှိနေသည်။

BYD Hefei မှာ လက်ရှိအားဖြင့် ဥရောပတွင် ကားချနေပြီး လုပ်ငန်းပြီးစီးပါက တရုတ်ပြည်သို့ ပြန်လာမည် ဖြစ်သည်။

BYD Xi’an မှာ ဘာစီလိုနာသို့ ဦးတည်ခုတ်မောင်းနေသည်။

BYD Shenzhen နှင့် Changsha တို့သည်လည်း ဥရောပသို့ ဦးတည်ခုတ်မောင်းနေသည်။

(BYD Jinan RoRo ကားတင်သင်္ဘောကြီးကို တွေ့ရပုံ။ ဓာတ်ပုံ-BYD video)

သို့သော် BYD သည် တရုတ်ပြည်ထုတ် ကားများကိုသာ ဖြန့်ဖြူးပို့ဆောင်နေခြင်း မဟုတ်ချေ။

ကားအစင်းရေ ၇၀၀၀ တင်နိုင်သော BYD Zhengzhou သည် ညာမောင်းကားများကို ထိုင်းနိုင်ငံစက်ရုံမှ တင်ဆောင်ကာ ဥရောပသို့ သွားရောက်နေပြီး လက်ရှိအားဖြင့် ဘယ်လ်ဂျီယံတွင် ကုန်ချရန် သွားရောက်နေကြောင်း MarineTraffic ၏ အချက်အလက်များတွင် ဖော်ပြသည်။

BYD သည် ထိုင်းစက်ရုံမှ ကားများကို ပြည်ပသို့ ပထမဆုံးတင်ပို့သည့် ခရီးစဉ်လည်း ဖြစ်သည်။

ထိုင်းတွင် ထုတ်လုပ်ခြင်းမှာ တရုတ်ပြည်နှင့် အခြေအနေမတူချေ။ တရုတ်ပြည်မှာ ဥရောပသမဂ္ဂ၏ ထပ်တိုးခွန် ကောက်ခံခြင်းနှင့် ရင်ဆိုင်နေရပြီး ထိုင်းမှာမူ ထိုသို့ ထပ်တိုးခွန်အကောက်မခံရချေ။

(CarsDB Team မှ ရေးသား ဖော်ပြသည်။)

Credit: CarsDB.com

Ref: BYD completed its massive fleet, now able to export 1 million cars a year. But not just from China (carnewschina)