ရှားပါး Lamborghini တစ်စင်းကို ဧည့်ခန်းထဲတွင် နှစ်ပေါင်း ၄၀ ထားရှိခဲ့သော ကားပိုင်ရှင်က ရောင်းထုတ်ပစ်ရန် စီစဉ်ချိန်တွင် နံရံကို ဖြိုချကာ ကားထုတ်ခဲ့ရပုံ

၁၉၇၀ ပြည့်နှစ်ထုတ် Lamborghini Miura တစ်စင်းသည် ပိုင်ရှင်၏ ဧည့်ခန်းထဲတွင် နှစ်ပေါင်း ၄၀ ရှိနေခဲ့သည်။

မှန်ပါသည်။ ဧည့်ခန်းဖြစ်ပါသည်။ သင် ဖတ်ရှုလိုက်ရသည့်အချက်အလက် မမှားပါ။နောက်ဆုံးတွင် ပိုင်ရှင်က ကားကို ရောင်းချပစ်ရန် ဆုံးဖြတ်ခဲ့ရာ အိမ်ထဲမှ ထုတ်ရန်အတွက် ဧည့်ခန်းနံရံကို ဖြိုချလိုက်ရသည်။

ရှားပါးကားများ ကိုင်တွယ်သည့် အကျိုးဆောင်တစ်ဦးဖြစ်သူ Larry Kosilla သည် အံ့ဖွယ် Lamborghini Miura တစ်စင်းအကြောင်း သူငယ်ချင်းတစ်ဦးထံမှ သိရှိလာသည်။အဆိုပါကားသည် အမေရိကန်ပြည်၊ နယူးယောက်ပြည်နယ်၊ Long Island ရှိ ဧည့်ခန်းတစ်ခုထဲတွင် နှစ်ပေါင်း ၄၀ ခန့် ရှိနေသည့်ကားဖြစ်သည်ဟု သိလာသည်။

အီတလီမြောက်ပိုင်းရှိ Lamborghini ကားစက်ရုံ၏ ထုတ်လုပ်ရေးလိုင်းမှ ၁၉၇၀ ပြည့်နှစ် ဇူလိုင်လတွင် ထွက်ရှိလာသည့် အဆိုပါကားသည် အမေရိကန်မှ ပိုင်ရှင်၏ ဧည့်ခန်းထဲတွင် ဆယ်စုနှစ် ၄ ခုရှိနေခဲ့ခြင်းဖြစ်ပြီး တစ်မိုင်မျှပင် မစီးရသေးချေ။

Lamborghini Miura ကို ကိုယ်တိုင် မျက်ဝါးထင်ထင် တွေ့မြင်ခဲ့သူ အကျိုးဆောင် Larry က ပြောသည်မှာ “ဒီကားက ကျွန်တော့်တစ်သက်တာ အကြိုက်ဆုံးကားတွေထဲမှာ တစ်ခုအပါအဝင် ဖြစ်ပါတယ်” ဟု ဆိုသည်။ ရှားပါးကား ကျွမ်းကျင်ပညာရှင် Larry သည် နှစ်ပေါင်းများစွာကာလအတွင်း ဈေးကြီးကာ ရှားပါးသည့် ကားအမျိုးမျိုး တွေ့ခဲ့ဖူးရာ ဒေါ်လာ ၄ သန်းတန် Aston Martin Valkyrie တစ်စင်းလည်း အပါအဝင်ဖြစ်သည်။

သို့သော် ယခု Lamborghini Miura မှာလည်း Larry ၏ နှလုံးသားထဲတွင် တစ်နေရာ အခိုင်အမာ သိမ်းပိုက်ထားနိုင်ခဲ့သည်။Lamborghini သည် ၁၉၆၆ ခုနှစ်မှ ၁၉၇၃ ခုနှစ်အကြား Miura ၇၆၄ စင်းသာ ထုတ်လုပ်ခဲ့သည်။ယင်းအနက် ၃၃၈ စင်းသာ S (P400S) ဗားရှင်းဖြစ်သည်။ ယခုကားမှာ Miura S ဗားရှင်းဖြစ်သည်။ 

ကမ္ဘာ့ပထမဆုံး ပြိုင်ကားအစစ်ဟု သတ်မှတ်ခံထားရသော Lamborghini Miura တွင် naturally aspirated 3.0-liter V12 အင်ဂျင် အသုံးပြုထားသည်။ဆွဲအား မြင်းကောင်ရေ ၃၆၅ နှင့် ရုန်းအား ၂၈၆ lb-ft ရှိသည်။

မူရင်း P400 နှင့်ယှဉ်လျှင် Miura S မှာ 20hp ပိုမိုအားကောင်းရာ အမြန်နှုန်းတင်နိုင်စွမ်းအနေဖြင့် 0 to 60 mph ကို ၅ ဒသမ ၅ စက္ကန့်အတွင်း ရရှိနိုင်သည်။ယနေ့ခေတ်တွင်မူ 0 to 60 mph မြန်နှုန်းကို ၂ စက္ကန့်အတွင်း ရနိုင်သည့်ကားများ တွေ့နေရပြီ ဖြစ်သည်။သို့သော် ထိုခေတ်ထိုကာလကမူ Miura S မှာ ကမ္ဘာ့အမြန်ဆုံးကား ဖြစ်ခဲ့သည်။

မိုင်ဝက်ခန့်ခရီးကို ၁၃ ဒသမ ၂ စက္ကန့်အတွင်း ရောက်ရှိနိုင်ပြီး အမြင့်ဆုံးမြန်နှုန်းမှာ 177 mph (285 kph) ဖြစ်သည်။

(CarsDB Team မှ ရေးသား ဖော်ပြသည်။)

Credit: CarsDB.com

Ref: Rare Lamborghini Parked in a Living Room for 40 Years, They Tore Down a Wall To Get It Out (autoevolution)