တရုတ်ပြည်တွင် အငှားယာဉ်မောင်းတစ်ဦးက ခရီးသည်တစ်ဦးကို ခရီးဝေးပို့ဆောင်ပေးခဲ့ရာ၌ ကီလို ၁၃၀ နှုန်းဖြင့် မောင်းနှင်နေချိန်တွင် လမ်းတစ်လျှောက်လုံး စတီယာရင်ကို လက်ဖြင့်ပင်မထိဘဲ ဖုန်းပွတ်နေခဲ့သည့်ဖြစ်ပုံ ပြည်မကြီးတွင် လူပြောများနေ

တရုတ်ပြည်တွင် တက္ကစီငှားရမ်းသည့် App မှတစ်ဆင့် ကားငှားခဲ့သူတစ်ဦးသည် ယာဉ်မောင်းက အန္တရာယ်ရှိလောက်သော မြန်နှုန်းဖြင့် မောင်းနေချိန်တွင် Autopilot mode ဖြင့် ထားရှိကာ ဖုန်းကိုသာကြည့်နေသည့်ဖြစ်ရပ်နှင့် စပ်လျဉ်းပြီး သက်ဆိုင်ရာကုမ္ပဏီထံ တိုင်တန်းခဲ့ရာ လျော်ကြေးအဖြစ် ၅ ယွမ် ( ၀ ဒသမ ၇ ဒေါ်လာ) မျှသာ ရရှိခဲ့သည့်ဖြစ်ရပ်မှာ တရုတ်ပြည်မကြီး လူမှုကွန်ရက်သုံးစွဲသူတို့အကြား လူပြောများနေသည်။

ခရီးသည်မှာ မျိုးရိုးအမည် လီဟု အမည်ရသည်။လီသည် အငှားယာဉ်ငှားရမ်းသည့် App ဖြစ်သော HelloRide မှတစ်ဆင့် ကားငှားခဲ့ခြင်း ဖြစ်သည်။
HelloRide ကို Alibaba က ပိုင်ဆိုင်သည်။Alibaba သည် South China Morning Post သတင်းဌာန၏ ပိုင်ရှင်လည်း ဖြစ်သည်။ဧပြီ ၅ ရက်တွင် တရုတ်ပြည် ဖူရှန်မြို့မှ ကွမ်တုံပြည်နယ်၊ လျိူဒင်းမြို့သို့ ကားငှားခဲ့ခြင်း ဖြစ်သည်။ခရီးအကွာအဝေးမှာ ကီလိုမီတာ ၁၈၀ (၁၁၁ ဒသမ ၈ မိုင်) ရှိပြီး ကားမောင်းရန် ကြာချိန်မှာ ၂ နာရီခန့် ဖြစ်သည်။

လီက ပြောသည်မှာ ခြောက်ခြားဖွယ် ခရီးစဉ်တစ်ခုဖြစ်ခဲ့ကြောင်း၊ ယာဉ်မောင်းမှာ ဖုန်းကိုသာကြည့်နေပြီး ခရီးတစ်လျှာက်လုံး စတီယာရင်တွင် လက်ပင် တင်ထားခြင်းမရှိကြောင်း ပြောသည်။ကားကို Autopilot mode ဖြင့် မောင်းနှင်ခဲ့ခြင်းဖြစ်သည်။အဝေးပြေးလမ်းမကြီးပေါ်တွင် ကီလို ၁၂၀ မှ ၁၃၀ ကြား (၇၄ မိုင်မှ မိုင် ၈၀ ကြား) အမြန်နှုန်းဖြင့် မောင်းနှင်နေချိန်တွင် ဖုန်းကိုသာ ကြည့်နေခဲ့ခြင်း ဖြစ်သည်။

လီက ပြောသည်မှာ ယာဉ်မောင်းသည် အမြန်ကြောကိုသာ အမြဲယူထားကြောင်း၊ တစ်ခါတစ်ရံတွင် အိပ်ငိုက်ချင်သည့် လက္ခဏာပင် တွေ့ရကြောင်း ပြောသည်။လီက ကားပေါ်တွင် ယာဉ်မောင်းနှင့် မိမိ ၂ ဦးတည်းသာရှိသောကြောင့် အမျိုးသားယာဉ်မောင်းကို မပြောဝံ့ခဲ့ကြောင်း ၊ ခရီးစဉ်တစ်လျှောက်လုံး သတိကြီးကြီးထားပြီး ယာဉ်မောင်းကိုယ်စား လမ်းကိုတစ်ချိန်လုံး စောင့်ကြည့်နေရကြောင်း ပြောသည်။

လီက ယာဉ်မောင်းကို ဓာတ်ပုံ တိတ်တဆိတ်ရိုက်ထားခဲ့ပြီး အငှားယာဉ် App platform ထံ တိုင်တန်းခဲ့သည့်အပြင် ယာဉ်ထိန်းရဲထံသို့ပါ တိုင်တန်းခဲ့သည်။အဆိုပါ platform က ပြောသည်မှာ မိမိတို့အနေဖြင့် ယာဉ်မောင်းကို သတိပေးထားပြီဖြစ်ကြောင်းပြောကာ လီအား ၅ ယွမ်တန် ကူပွန်တစ်ခု ပေးခဲ့သည်။ခရီးစဉ်၏ ကားခမှာ ယွမ် ၂၇၀ (၃၇ ဒေါ်လာ ) ဖြစ်သည်။လီက ကံကောင်းထောက်မ၍ အသက်ရှင်ခဲ့ခြင်းဖြစ်ကြောင်း ပြောခဲ့ပြီး လူမှုကွန်ရက်သုံးစွဲသူတို့ကလည်း လီ၏ ပြောဆိုမှုကို လက်ခံကြသည်။

“သူ့အနေနဲ့ ကားသမားကို ကားရပ်ခိုင်းသင့်တယ်။ ၁ နာရီ ကီလို ၁၃၀ နှုန်းက အက်ဆီးဒင့်ဖြစ်မယ်ဆိုရင် သေနိုင်ပါတယ်” ဟု လူမှုကွန်ရက်သုံးစွဲသူတစ်ဦးက မှတ်ချက်ပြုသည်။ “Autopilot mode ကို အလွန်အကျွံ မှီခိုအားထားတဲ့ ဖြစ်ရပ်ပါပဲ။ ခရီးသည်ရဲ့ ဘေးကင်းလုံခြုံမှုကို မလေးစားတဲ့ ယာဉ်မောင်းတွေကို ကားမောင်းခွင့် မပေးသင့်ပါဘူး” ဟု အခြားတစ်ဦးက မှတ်ချက်ပြုသည်။

(CarsDB Team မှ ရေးသား ဖော်ပြသည်။)

Credit: CarsDB.com