မလေးရှားတွင် လစာ ရင်းဂစ် ၂၅၀၀ သာရသည့် မိန်းကလေးတစ်ဦးက “အသက်ကြီးလာရင် နောင်တ မရချင်ဘူး” ဟုပြောကာ အချိန်ပိုင်းအလုပ် ၃ ခုလုပ်ရင်း BYD Seal တစ်စင်းကို ၉ နှစ်အရစ်ကျဖြင့် ဝယ်ယူခဲ့သည့်ကိစ္စ မလေးရှား လူမှုကွန်ရက်သုံးစွဲသူများအကြား နာမည်ကြီးနေ

လစာနည်းသူတို့အနေဖြင့် ကားတစ်စင်းဝယ်နိုင်ရန် ငွေစုမည်ဆိုလျှင် ခက်ခက်ခဲခဲကြိုးစားကာ စွန့်လွှတ်စတေးမှုများ ပြုလုပ်ရမည်ဖြစ်သည်။ အထူးသဖြင့် ဈေးသက်သာသော လျှပ်စစ်ကားတစ်စင်း ဝယ်မည်ဆိုလျှင်ပင် မလွယ်ကူလှ။

မလေးရှားနိုင်ငံမှ မိန်းကလေးတစ်ဦးက သူ၏ လစာမှာ ရင်းဂစ် ၂၅၀၀ သာရသော်လည်း BYD Seal တစ်စင်းဝယ်နိုင်ရန် မည်သို့မည်ပုံ စီစဉ်ခဲ့သည်ကို လူမှုကွန်ရက်တွင် မျှဝေပြောပြလာခဲ့သည်။

မလေးရှားတွင် BYD Seal ၏ variant ၂ မျိုးကို မကြာသေးမီက ဖြန့်ချိခဲ့သည်။

Seal Premium (extended range) မှာ ဈေးတန်း ရင်းဂစ် ၁၇၉၈၀၀ မှ ၁၈၀၄၃၀ ကြားရှိ (third-party ကုမ္ပဏီ၏ အာမခံကြေး မပါသေး) သည်။Seal Performance AWD မှာ ရင်းဂစ် ၁၉၉၈၀၀ မှ ၂၀၀၄၃၀ ကြား (third-party ကုမ္ပဏီ၏ အာမခံကြေး မပါသေး) ရှိသည်။

အသက် ၂၄ နှစ်အရွယ်ရှိ မလေးရှား မိန်းကလေးက အဆိုပါကားကို မိမိဘာသာ ငွေပေးသွင်း ဝယ်ယူခဲ့ခြင်းဖြစ်ကြောင်း Threads လူမှုကွန်ရက်တွင် ရေးသားဖော်ပြလာသည်။

(မှတ်ချက်။ Threads မှာ Meta ၏ Instagram မှ ထုတ်လုပ်သော text အခြေပြု လူမှုကွန်ရက်ဖြစ်သည်။ Threads အကောင့်ဖွင့်ရန်အတွက် အင်စတာဂရမ်အကောင့် ရှိရန်လိုအပ်သည်)

Threads လူမှုကွန်ရက်တွင် အဆိုပါမိန်းကလေးက @‌carmensbaeisfood ဟူသော အကောင့်ဖြင့် ဖော်ပြသည်မှာ BYD Seal အတွက် လက်ငင်းပေးသွင်းငွေ ရင်းဂစ် ၃၁၀၀၀ ပေးသွင်းခဲ့ပြီး တစ်လလျှင် ရင်းဂစ် ၁၇၀၀ နှုန်း ၉ နှစ်ပေးသွင်းမည့် အစီအစဉ်ဖြင့် ဝယ်ယူခဲ့ခြင်းဖြစ်သည်ဟု ဆိုသည်။

ပေးသွင်းငွေပမာဏမှာ flexible ရှိသောကြောင့် ဝယ်ယူခဲ့သည့် EV အတွက် ၇ နှစ်ဖြင့် အကြေဆပ်ရန် ရည်မှန်းထားကြောင်းလည်း ၎င်းက ပြောသည်။

“ကျွန်မ အသက်ကြီးလာတဲ့အခါ နောင်တ မရချင်ဘူး။ (အခုမဝယ်ရင်လည်း) နောင်တချိန်ချိန်မှာ ကျွန်မဟာ ကားတစ်စင်း ဝယ်နိုင်လိမ့်မယ်ဆိုတာ ယုံကြည်ပါတယ်။ ဒါပေမယ့် အသက်ကြီးသွားလို့ နောက်ကို ပြန်လှည့်ကြည့်လိုက်တဲ့အခါ BYD Seal တစ်စင်း မဝယ်ခဲ့ရလို့ နောင်တမရချင်ပါဘူး” ဟု Carmen က ရေးသားဖော်ပြသည်။လက်တွေ့ဘဝတွင် အဆိုပါဝင်ငွေမျှဖြင့် မည်သူမှ EV ဝယ်နိုင်မည်မဟုတ်ချေ။

Carmen က သူ၏ပို့စ်မှ ကွန်မန့်တွင် ရှင်းပြသည်မှာ အထက်တန်း ကျောင်းသူဘဝကတည်းက အချိန်ပိုင်းအလုပ်များလုပ်ကာ ခြိုးခြံချွေတာပြီး ငွေစုခဲ့ကြောင်း၊ အစားအသောက်များကို ၂ ရင်းဂစ်ဖိုးမျှသာ ဝယ်ယူခြင်းဖြင့် ချွေတာခဲ့ကြောင်း ပြောပြသည်။

ထို့အပြင် BYD Seal အတွက် အရစ်ကျငွေသွင်းရန်နှင့် အခြားကုန်ကျစရိတ်များ ကာမိစေရန် အချိန်ပိုင်း အလုပ် ၃ ခု လုပ်ကိုင်လျက်ရှိနေသည်။အထက်တန်းနှင့် တက္ကသိုလ်တက်ခဲ့စဉ်က full scholarship များ ရခဲ့သောကြောင့် ကျောင်းစရိတ်မကုန်ခဲ့ ကြောင်းလည်း ၎င်းက ရှင်းပြသည်။

ထို့အပြင် မိဘများနှင့် အတူနေသောကြောင့် နေရေးအတွက်လည်း ငွေကုန်စရာမလိုရာ ဝယ်ယူထားသော EV အတွက်သာ ငွေကုန်စရာရှိသည်။“မိသားစုနဲ့ အတူနေတာကြောင့် အိမ်ငှားခ မကုန်ပါဘူး။ အိမ်ရဲ့ အထွေထွေစရိတ်တွေက အမေကုန်တာပါ” ဟု Carmen က ကွန်မန့်တစ်ခုကို reply ပြန်ထားသည်။

လူမှုကွန်ရက်သုံးစွဲသူတစ်ဦးက Carmen အား အဘယ်ကြောင့် EV ကို ရွေးချယ်သနည်းဟု မေးရာ အလုပ်ကို ပိုမိုကြိုးကြိုးစားစားလုပ်ရန် လှုံ့ဆော်ပေးနိုင်သောကြောင့်ဖြစ်ကြောင်း ၎င်းက ဖြေကြားထားသည်။
၎င်းနှင့် သဘောထားကွဲလွဲသူတစ်ဦးအား Carmen က တုံ့ပြန်ထားသည်မှာ မိမိ၏ငွေကို ကားတွင် သုံးစွဲရန် ရွေးချယ်ခဲ့ခြင်းဖြစ်ကြောင်း၊ လူတစ်ဦးစီတိုင်းတွင် ငွေသုံးစွဲမှုနှင့် စပ်လျဉ်းပြီး ဦးစားပေးကဏ္ဍ မတူနိုင်ကြောင်း၊ သို့သော် EV တွင် ငွေသုံးခြင်းမှာ အကောင်းဆုံးခြေလှမ်းမဟုတ်ဟူသည့် မှတ်ချက်ပြုသူ၏ သဘောထားကိုလည်း သဘောတူပါကြောင်း ဖြေကြားထားသည်။

(CarsDB Team မှ ရေးသား ဖော်ပြသည်။)

Credit: CarsDB.com

Ref: 24-year-old manages to pay off BYD Seal down-payment with RM2.5k salary