EV ဆိုင်ကယ် နှင့် EV သုံးဘီး အများဆုံးတင်သွင်းနေသည့် မူဆယ် (၁၀၅) မိုင် ကုန်သွယ်ရေးဇုန်ပိတ်ထားလို့ ရေကြောင်းကနေတင်ပို့နေ

တရုတ်နိုင်ငံနဲ့ အဓိကကုန်သွယ်ရေးဇုန်တစ်ခုဖြစ်တဲ့ မူဆယ် (၁၀၅) မိုင်နဲ့ ချင်းရွှေဟော် ကုန်သွယ်ရေးဇုန်တွေကို ပိတ်ထားတာ (၄) လနီးပါး ရှိလာပြီဖြစ်လို့ EV ဆိုင်ကယ်နဲ့ EV သုံးဘီးတွေကို ပင်လယ်ရေကြောင်းကနေ တင်သွင်းနေရတယ်လို့ ကုန်သည်တွေနဲ့ တင်သွင်းနေတဲ့ကုမ္ပဏီတွေက ပြောပါတယ်။

အရင်က နယ်စပ်ဂိတ်တွေမှာ ဆန်၊ဆန်ကွဲ ၊ ရေထွက်ပစ္စည်း၊ ရော်ဘာစတဲ့ကုန်ပစ္စည်းတွေ တရုတ်နိုင်ငံဘက်ကို တင်ပို့နေပြီး တရုတ်နိုင်ငံဘက်ကလည်း လျှပ်စစ်ပစ္စည်း ၊ ဓာတ်မြေသြဇာ ၊ EV ဆိုင်ကယ်နဲ့ EV သုံးဘီး စတဲ့ ကုန်ပစ္စည်းတွေ မြန်မာနိုင်ငံထဲကို တင်သွင်းနေတာပါ။ ဒါပေမဲ့ အခုတော့ ကုန်သွယ်ရေးရပ်ဆိုင်းနေတယ်လို့ ကုန်သည်တွေကဆိုပါတယ်။

တရုပ်-မြန်မာနယ်စပ်မှာရှိတဲ့ ကုန်သွယ်ရေးဂိတ်များဟာဆိုရင် မူဆယ် ၊ လွယ်ဂျယ် ၊ ချင်းရွှေဟော် ၊ ကန်ပိုက်တီနဲ့ ကျိုင်းတုံနယ်စပ်ကုန်သွယ်ရေး ဂိတ်တွေဖြစ်ပြီး ကုန်သွယ်မှုအများဆုံးကတော့ မူဆယ်နဲ့ ချင်းရွှေဟော်နယ်စပ်ကုန်သွယ်ဂိတ်ဖြစ်ပါတယ်။ ၂၀၂၃ -၂၀၂၄ ဘဏ္ဍာနှစ်ရဲ့ ဧပြီလ(၁)ရက်နေ့ကနေ ဖေဖော်ဝါရီလ (၂)ရက်နေ့အထိ မြန်မာ-တရုတ်နယ်စပ်ကုန်သွယ်ရေးကနေ အမေရိကန်ဒေါ်လာ (၂ ဒသမ ၈၃ ) ဘီလီယံ ကုန်သွယ်ထားတယ်လို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ကုန်သွယ်မှုစာရင်းတွေမှာ ဖော်ထားပါတယ်။

(CarsDB Team မှ ရေးသား ဖော်ပြသည်။)

Credit: CarsDB.com