ဘေးစတေကာအဝါရောင်လိုင်းမကပ်တဲ့ City Taxi ယာဉ်တွေကို ဖေဖော်ဝါရီလ(၁)ရက်နေ့ကနေစတင်ပြီး အရေးယူမည်

ရန်ကုန်မှာပြေးဆွဲနေတဲ့  City Taxi  ယာဉ်တွေအားလုံးကို ဘေးစတေကာအဝါရောင်လိုင်းကပ်ဖို့ညွှန်ကြားထားပြီး ပြီးခဲ့တဲ့နှစ် နိုဝင်ဘာလကနေ အခုနှစ် ဇန်နဝါရီလကုန်အထိပညာပေးကာလသတ်မှတ်ထားတာပါ။ ဘေးစတောကာတပ်ဆင်ခြင်းမရှိတဲ့  City Taxi  ယာဉ်တွေကို ဖေဖော်ဝါရီလ (၁) ရက်နေ့ကနေစပြီး အရေးယူမှုတွေလုပ်ဆောင်သွားမယ်လို့ ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC) ကသိရပါတယ်။

အခုလက်ရှိမှာ ရန်ကုန်မြို့မှာရန်ကုန်လိုင်စင်နဲ့ပြေးဆွဲနေတဲ့ City Taxi ယာဉ်တွေရှိသလို ပဲခူး၊ဧရာဝတီ ၊ မွန် ၊ ကရင် စတဲ့ နယ်လိုင်စင်နဲ့ပြေးဆွဲနေတဲ့ City Taxi ယာဉ်တွေလည်းရှိနေတဲ့အတွက် နယ်လိုင်စင် City Taxi ယာဉ်တွေလည်းဘေးစတေကာအဝါရောင်တပ်ဆင်ရမှာဖြစ်တယ်လို့ ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ  (YRTC) ကထပ်မံအသိပေးချက်ထုတ်ပြန်ထားပါသေးတယ်။

City Taxi  ယာဉ်တွေဟာ ဘေးစတေကာအပြင်ဆိုင်းဘုတ်အချက်ပြမီးတပ်ဆင်တာ၊ Taxi ဆိုင်းဘုတ်အရွယ်အစားတပြေးညီတပ်ဆင်တာစတဲ့ညွှန်ကြားချက်တွေထုတ်ပြန်ထားပြီး မလိုက်နာရင်ဒဏ်ကြေးအပြင်လိုင်စင်ပိတ်တဲ့အထိအရေးယူသွားမယ်လို့ ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC) ကသိရပါတယ်။

YRTC  အနေနဲ့  ၂၀၂၃ ခုနှစ် ဒီဇင်ဘာ ၂၃ ရက်နေ့အထိစာရင်းများအရဘေးအဝါရောင်လိုင်းစတေကာတပ်ဆင်ပြီးစီးမှု  ၇၅ ရာခိုင်နှုန်း၊ ခန့်မှန်းအစီးရေ ၄၂၀၀၀ ခန့် တပ်ဆင်ပြီးစီးကြောင်းသိရပါတယ်။

လက်ရှိ စီးတီးတက္ကစီးယာဉ်အဖြစ် မှတ်ပုံတင်ထားတဲ့ ယာဉ်အစီးရေ ၅၈,၄၈၁  စီးရှိရာမှာ YRTC ထံမှတ်ပုံတင်ထားတဲ့ စီးတီးတက္ကစီ ၅၅,၂၂၇  စီးရှိတယ်လို့လည်းသိရပါတယ်။

(CarsDB Team မှ ရေးသား ဖော်ပြသည်။)

Credit: CarsDB.com