ရန်ကုန်စည်ပင်နယ်နမိတ်တွင် စီးနင်းသွားလာသည့် ဆိုင်ကယ်များအား ထိရောက်စွာ အရေးယူဆောင်ရွက်မည်

0

Full article

ရန်ကုန်တိုင်းဒေသကြီး စည်ပင်သာယာနယ်နမိတ်အတွင်း ဆိုင်ကယ်စီးနင်းခွင့်ပြုထားခြင်းမရှိပဲ လိုင်စင်မဲ့ ဆိုင်ကယ်များကို ထိရောက်စွာ အရေးယူဆောင်ရွက်သွားမည်ဖြစ်ကြောင်း ရန်ကုန်တိုင်း ဒေသကြီး ယာဉ်ထိန်းရဲတပ်ဖွဲ့မှုးရုံးတာဝန်ရှိသူတစ်ဦးထံမှ သိရသည်။ ရန်ကုန်တိုင်းဒေသကြီးအတွင်းတွင် ဆိုင်ကယ်စီးနင်းမှုကို ဌာနဆိုင်ရာဆိုင်ကယ်များကိုသာ စီးနှင်းခွင့်ပြုထားပြီး ဌာနဆိုင်ရာများဖြစ်သော စာပို့လုပ်ငန်း လျှပ်စစ်ဝန်ထမ်းများ မြန်မာနိုင်ငံ ရဲတပ်ဖွဲ့ဆိုင်ကယ်များကိုသာ စီးနင်းခွင့်ပြုထားသည်။ထိုသို့ စီးနင်းသွားလာရာတွင်လည်း ဌာနဆိုင်ရာ အမှတ်တံဆိပ်ကပ်၍ ယူနီဖောင်းဝတ်ဆင်ရမည်ဖြစ်ပြီး လူနှစ်ယောက်တင်ဆောင်စီးနင်းခွင့်မပြုကြောင်းသိရသည်။

ရန်ကုန်မြို့မှာ လိုင်စင်မဲ့ မောင်းနှင်တဲ့ဆိုင်ကယ်တွေကို ထိထိရောက်ရောက်အရေးယူသွားမှာပါ။ အခုလည်း အရေးယူဖမ်းစီးတာတွေရှိပါတယ်။ သတ်မှတ်ထားတဲ့ ဌာနဆိုင်ရာတွေနဲ့ သတ်မှတ်ထားတဲ့ အတိုင်းမောင်းနှင်သွားလာရမှာဖြစ်ပါတယ်။ ဟုရန်ကုန်တိုင်း ယာဉ်ထိန်းရဲတပ်ဖွဲ့မှ တာဝန်ရှိသူတစ်ဦးက ပြောသည်။ဌာနဆိုင်ရာများ ဆိုင်ကယ်စီးနင်းရာတွင် မိမိ သက်ဆိုင်ရာဝန်ကြီးဌာနတွင်အကြောင်းကြားထားရန်လိုအပ်ပြီး သတ်မှတ်ချက်အတိုင်းသာမောင်းနှင်ရမှာဖြစ်သည်။

ရန်ကုန်တိုင်း ဒေသကြီး လိုင်စင်မဲ့ ဆိုင်ကယ်များကို မောင်းနှင်နေသည့်မြို့နယ်မှားမှာ မြောက်ဥက္ကလာပမြို့နယ် မင်္ဂလာဒုံမြို့နယ် လှိုင်မြို့နယ် ဒဂုံမြို့သစ်တောင်မြို့နယ် သင်္ယန်းကျွန်းမြို့နယ် သန်လျင်မြို့နယ် သာကေတမြို့နယ်များတွင် စီးနင်းသွားလာမှု အများဆုံးဖြစ်ကြောင်းသိရသည်။

ခေတ်သစ်

Author