မကြာမီက အသစ်ထွက်ရှိထားသော ကမ္ဘာကျော်မင်းသား Bruce Willis ၏ A Good Day To Die Hard ဇာတ်ကားသစ်သည် မော်တော်ကား ချစ်သူများအတွက်တော့ စိတ်မချမ်းမြေ့ ဖွယ်ရာပင်ဖြစ်နေပါလိမ့်မည်။ ဒါရိုက်တာ John Moore ၏ပြောကြားချက်အရ ထိုကား၏ ဇာတ်ဝင်ခန်းများ ရိုက်ကူးရင်း ကားအစီးရေပေါင်း ၁၃၂ စီးသည် ပြန်သုံး၍မရတော့လောက်အောင် ပျက်စီးခဲ့သည်ဟု ဆိုသည်။ ထိုကားများထဲတွင် ကားအကောင်းစားများလည်း ပါဝင်ခဲ့သည်ဟု သိရသည်။

ထိုဇာတ်ကား၏ ကားအချင်းချင်းပြိုင်မောင်း၍ တိုက်ခိုက်သော အခန်းများတွင် ကားအစီးရေပေါင်းများစွာအား ဝင်တိုက်ခြင်း၊ ရပ်ထားသော ကားများပေါ်သို့ ကားဖြင့်ဖြတ်မောင်းသွားခြင်းတို့ ပါဝင်သည်။ တန်ဖိုးကြီး ပြိုင်ကားအမျိုးအစားဖြစ်သော Lamborghini ကားအစစ်ပေါ်သို့ ကားဖြင့်ဖြတ်မောင်းသည့် ဇာတ်ဝင်ခန်းမျိုးလည်းပါဝင်ပြီး ဒါရိုက်တာ John Moore က ထိုအခန်းများမှာ သူ့အတွက် စိတ်ထိခိုက်ဖွယ်ရာကောင်းသည်ဟု ပြောပြသည်။ ဇာတ်လမ်းရိုက်ကူးပြီးသွား၍ ထိုဇာတ်ကားတွင် ဖျက်စီးခဲ့သော ကားများ၏ တန်ဖိုးကို တွက်ချက်ကြည့်သောအခါ ဒေါ်လာ ၁၁သန်းခန့် ရှိသည်ဟု လည်းကောင်းကပြောကြားသည်။

သို့သော်လည်း ထို ဒေါ်လာ ၁၁သန်းတွင် Mercedes-Benz G-Class SUV ကားများ၏ တန်ဖိုးမပါဝင်သေးကြောင်းသိရသည်။ မာစီးဒီးကားကုမ္ဗဏီမှ ထိုကားများကို ဇာတ်ကားရိုက်ကူးရာတွင် အသုံးပြုရန် အလကားပေးခဲ့ခြင်းဖြစ်ပြီး ထို SUV ကားအားလုံးမှာလည်း ဇာတ်ဝင်ခန်းအရ ပျက်စီးခဲ့ရသည်။ ထိုဇာတ်ကားတွင် အသုံးပြုခဲ့သည့် မာစီးဒီး ကားများအကြောင်း video ကိုအောက်တွင် ကြည့်ရှုနိုင်ပါသည်။