Full article

ယခုတစ်လော နာမည်ကြီးကားကုမ္ပဏီကြီးများ မီနီကားငယ်လေးတွေ အပြိုင်အဆိုင်ထုတ်လာကြတာကိုတွေ့ရပါသည်။ Chevy Spark, Scion IQ, Mini Cooper, FIAT 500 စသည်ဖြင့်ဈေးကွက်မှာ အပြိုင်အဆိုင်ဖြစ်နေတာကို စာဖတ်သူတို့သတိထားမိကြမည်ထင်ပါသည် ။ မီနီကားငယ်လေးတွေကို ဂျပန်ဈေးကွက်မှာသာ ယခင်ကအတွေ့များခဲ့ပါသည်။ Kei Car ဟု ဂျပန်လိုခေါ်ကြပြီး ဂျပန်ပြည်သွင်းသုံးရန်သာထုတ်လုပ်ကြခြင်းဖြစ်ပါသည်။ Export လုပ်လေ့မရှိကြပါ။ ထို့အတွက်ကြောင့်လည်း အမေရိကန်ကုမ္ပဏီများက အထက်ပါ မီနီကားများကို စတင်ထုတ်လုပ်လာကြခြင်းဖြစ်နိုင်သည်။ ၎င်းတိုင်းပြည်များတွင် ယာဉ်ရပ်နားရန်ခက်ခဲခြင်း၊ ယာဉ်ကြောပိတ်ဆို့ခြင်း၊ ဓါတ်ဆီ ဈေးကြီးခြင်းတို့ကြောင့် မီနီကားများပေါ်ပြူလာဖြစ်လာပါသည်။

honda02

honda01

ထို့အတွက်ကြောင့် ယမန်နေ့တွင် Honda ကုမ္ပဏီမှလည်း ယင်း၏ ပေါ်ပြူလာ N-One 2013 ထွက်ရှိတော့မည်ဟု အသေးစိတ်ကြေငြာလိုက်သည်။ ၁၉၆၇ ခုနှစ်တွင်စထုတ်ခဲ့သော ထိုကားငယ်လေးများသည် ဂျပန်ပြည်တွင်းဈေးကွက်တွင် အလွန်အသုံးဝင်သော လူကြိုက်များသောကားလေးများဖြစ်ခဲ့သည်။ ယခု Honda N-One 2013 တွင်လည်း ဒီဇိုင်း၊ ကိရိယာစုံလင် ဆန်းသစ်စွာဖြင့် တစ်ဖန်ပြန်ထုတ်လုပ်ထားသဖြင့် လူငယ်ဆန်၊ ချစ်ခင်နှစ်သက်ဖွယ်ကောင်းသော ကားတစ်စီးဖြစ်သည်ကို မြင်တွေ့ရပေမည်။ 660 cc (.66 liter) ကားငယ်လေးဖြစ်ပြီး 2WD သို့ 4WD (all wheel drive) ဆိုပြီး ရွေးချယ်ဝယ်ယူနိုင်ပါသည်။ Power အားဖြင့် ပုံမှန် မြင်းကောင်ရေ 58 HP ရှိပြီး Turbo Charge လုပ်လျှင် 64 HP အထိ အသုံးပြုနိုင်သည်။ မြန်နှုန်း ကီလို 100-120 အထိ မောင်းနှင်နိုင်မည်ဟု ကြားသိရသည်။ မြို့တွင်းနဲ့ ဟိုင်းဝေးအနည်းအကျဉ်းလောက်တော့ရနိုင်မည်ထင်သည်။ Auto Gear နည်းပညာတစ်ခုဖြစ်သည့် ဆီစားသက်သာသော CVT (continuously variable transmission) ကို အသုံးပြုထားသည့်အတွက် Manual သမားများတော့ စိတ်ပျက်ပေလိမ့်မည်။ သို့သော် Honda N-One ကားသည် 133.3 inches သာ ရှည်လျားပြီး ၁တန် ပြည့်ဖို့ အများကြီးလိုသောကြောင့်အင်မတန် သေးငယ်ပေါ့ပါးသည်ဟုဆိုနိုင်သည်။ အနီးစပ်ဆုံး FIAT 500 ထက်အဆများစွာသေးငယ်နေသေးသည်ဟုလည်း သိရှိရသည်။ ကားအရွယ်အစားကိုလျှော့ချရန် Honda သည် ဤကားငယ်တွင် ဆီတိုင်ကီကို မူလ အနောက်ဘက် ခရီးသည်ထိုင်ခုံအနားမှ ဒရိုင်ဘာထိုင်ခုံအောက်သို့ရွှေ့ပြောင်း ထားရှိလိုက်သည်။ အသစ် ရောင်းဈေး US$ 14,000 ခန့်ရှိမည်ဖြစ်ပြီး ဂျပန်နိုင်ငံတွင်သာရောင်းချမည်ဖြစ်သည့်အတွက် မိတ်ဆွေတို့ လိုချင်လျှင် Second Hand သာရနိုင်ပါသည်။

honda04

honda03

စာရေးသူအနေဖြင့် Honda N-One ကို Chevy Spark 2013 ဖြင့်နှိုင်းယှဉ်ကြည့်မိရာ အောက်ပါ အချက်များတွင် မယှဉ်နိုင်သည်ကိုတွေ့ရှိရသည်။

၁. Honda N-One ၏အမြင့်ဆုံးပါဝါသည် 64 HP သာရှိပြီး Chevy Spark က 84 HP အထိ အသုံးပြုနိုင်ခြင်း

၂. Chevy Spark တွင် Manual 5-Step Gear အသုံးပြုနိုင်ခြင်း

၃. နိုင်ငံတကာတွင် ဝယ်ယူနိုင်ခြင်း

honda05

သို့သော်ငြားလည်း အင်မတန် ဆန်းသစ်နှစ်လိုဖွယ်ကောင်းသည့် ဒီဇိုင်း၊ အတွင်းခန်းကျယ်ဝန်းမှု စသည့်အချက်များကြောင့် Honda N-One ကိုလည်း ကမ္ဘာတစ်ဝှမ်းလူကြိုက်များကြမည်မှာမလွဲပေ။ ကျွန်တော်တို့ မြန်မာနိုင်ငံတွင်လည်း မကြာမီကာလများမှာ တင်သွင်းလာသည်ကို တွေ့ရမှာ သေချာပါသည်။ မိတ်ဆွေတို့ကော ဤ ကားငယ်လေးများကို နှစ်သက်ကြပါသလား။ သို့မဟုတ် အခြားဘယ် မီနီကားကို အကြိုက်ဆုံးလဲ ခင်ဗျာ။

MyanmarCarsDB Editor

2013_honda_n-one_1

Author