အင်ဂျင်ခန်းထဲက လေစစ် (Air Filter) မှာ အင်ဂျင်ဝိုင်တွေ တွေ့နေရတယ်ဆိုရင်

0

Full article

လေစစ် (Air Filter) ဆိုတာကတော့ ယနေ့ခေတ်  ကားအင်ဂျင်တိုင်းအတွက် မရှိမဖြစ်လိုအပ်တဲ့ ပစ္စည်းတစ်ခုပါ။ လေစစ် (Air Filter) တွေကို ကားအင်ဂျင်ရဲ့ လေအဝင်ပေါက် (Inlet Manifold) ကနေတစ်ဆင့် ချိတ်ဆက်ထားတဲ့ လေစစ်အထိုင်ခွက်ထဲမှာ ဖွဲ့စည်းတည်ဆောက်ထားပါတယ်။ လေစစ် (Air Filter) ရဲ့ အဓိက တာဝန်က အင်ဂျင်အတွင်းပိုင်းထဲမှာ မီးလောင်ပေါက်ကွဲဖို့ လိုအပ်တဲ့ လေ (Oxygen) တွေထဲက ဖုန်တွေ၊ သဲတွေ၊ အညစ်အကြေးတွေ၊ ရေခိုးရေငွေ့တွေကို သန့်စင်ပေးဖို့ပါပဲ။ ကျနော်တို့ လက်ရှိသုံးနေတဲ့ကားအင်ဂျင်တွေဟာ ဆီ (လောင်စာဆီ) နဲ့ လေတွေ ရောနှောပြီးမှ မီးလောင်ပေါက်ကွဲပြီး စွမ်းအင်ရတာမို့ လေစစ်ပိတ်ဆို့တယ်ဆိုရင် မီးလောင်ပေါက်ကွဲဖို့ အဓိက လိုအပ်ချက်ဖြစ်တဲ့ လေ (Oxygen) ပမာဏ လျော့နည်းသွားတာမို့ ကားအင်ဂျင်ရဲ့ လုပ်ငန်းဆောင်တာတွေကို အနှောင့်အယှက်ပေးမှာ မလွဲမသွေပါပဲ။

လေစစ် (Air Filter) တွေ သာမန်ပိတ်ဆို့တာထက် ပိုဆိုးတဲ့အခြေအနေတစ်ခုက လေစစ် (Air Filter) မှာ အင်ဂျင်ဝိုင်အစအနတွေ၊ ဆီအစအနတွေ မြင်တွေ့ရတာပါ။ လေစစ် (Air Filter) တွေကို ဖြုတ်စစ်ဆေးရင်း ဒီလို အင်ဂျင်ဝိုင်အစအနတွေ၊ ဆီအစအနတွေ မြင်တွေ့ရတယ်ဆိုရင် ဘာတွေဖြစ်နိုင်တယ်၊ ဘာတွေ ဖြစ်တတ်တယ်ဆိုတာ ဆွေးနွေးတင်ပြပေးချင်ပါတယ်။

လေစစ် (Air Filter) ဆိုတာ လေအဝင် (Inlet အဝင်) လမ်းကြောင်းမှာရှိတာမို့ ပုံမှန်အတိုင်းဆိုရင် အင်ဂျင်ဝိုင်တွေ ဆီအစအနတွေဟာ ဒီလေစစ်မှာရောက်နေစရာမရှိပါဘူး။ ဒါပေမဲ့ အင်ဂျင်ချို့ယွင်းမှုတစ်ခုခုကြောင့် ဒီလိုလေစစ် (Air Filter) မှာ အင်ဂျင်ဝိုင်အစအနတွေ တွေ့ရတယ်ဆိုရင် ဒီလိုတွေ့ရတဲ့ အဓိက အကြောင်းအရင်းက Blow-by gases ကြောင့်ဖြစ်ပြီး အဲဒီ Blow-by gases တွေဖြစ်ပေါ်စေတဲ့ အကြောင်းရင်းတွေထဲကမှ အဖြစ်များဆုံး အကြောင်းရင်း သုံးခုကတော့...

  • PCV (Positive Crankcase Ventilation Valve) ပိတ်တာ
  • Piston Rings တွေမကောင်းတာ
  • Oil Passages ဆိုတဲ့ လမ်းကြောင်းတွေ ပိတ်ဆို့တာပါ။

အဲဒီအကြောင်းရင်းတွေ မပြောခင် Blow-By Gases ဆိုတဲ့အကြောင်း အရင်ဆုံးရှင်းပြချင်ပါတယ်။

Blow-By လို့ခေါ်တဲ့ အင်ဂျင်အတွင်းပိုင်း မလိုအပ်တဲ့ ဖိအားတွန်းအားတွေဆိုတာ...

ကျနော်တို့လက်ရှိအသုံးပြုနေတဲ့ Internal Combustion Engine လို့ခေါ်တဲ့ အတွင်းပိုင်း မီးလောင် ပေါက်ကွဲပြီးမှ စွမ်းအင်ရရှိတဲ့ အင်ဂျင်တွေမှာ Blow-By လို့ခေါ်တဲ့ အင်ဂျင်အတွင်းပိုင်းမှာ မလိုလားအပ်တဲ့ ဖိအားတွန်းအားတွေ တည်ဆောက်မှုရှိပါတယ်။ အဲဒီ Blow-By ဘယ်လိုဖြစ်ပေါ်လာသလဲဆိုရင်တော့ ကားအင်ဂျင်တွေမှာရှိတဲ့ 4 Strokes (Intake ၊ Compression ၊ Power ၊ Exhaust) ထဲကမှ ကားအင်ဂျင်အတွက် အဓိက စွမ်းအင်ရတဲ့ Power Stroke ကနေဖြစ်ပေါ်လာတာပါ။ အင်ဂျင်လည်ပတ်ဖို့ Intake Stroke မှာ ဆီနဲ့ လေကိုဆွဲသွင်းမယ်၊ အဲဒီလေကို ဖိကျစ်မယ်၊ ပြီးရင် မီးလောင်ပေါက်ကွဲမှုဖြစ်ပြီး Crank Shaft ကိုတွန်းဖို့ Power Stroke ကိုရရှိပါတယ်။ အဲဒီ Power Stroke တစ်ခုရဖို့ အင်ဂျင်ရဲ့ Combustion Chamber ဆိုတဲ့ မီးလောင်ခန်းထဲမှာ ဖိကျစ်ထားတဲ့ ဆီနဲ့လေအရောအနှောတွေဟာ အပြင်းအထန်ပေါက်ကွဲရပါတယ်။ ဒါမှလည်း အင်ဂျင်မှာတပ်ဆင်ထားတဲ့ အဓိက လည်ပတ်ရမယ့် Crank Shaft ကို လည်အောင် တွန်းအားပေးနိုင်မှာပါ။

ဒီလို မီးလောင်ပေါက်ကွဲမှု ဖြစ်ပေါ်တဲ့အခါ မီးလောင်ပေါက်ကွဲမှု စွမ်းအားတွေ  မဆုံးရှုံးရလေအောင် အဓိက ထိန်းပေးထားတဲ့ ပစ္စည်းက မီးလောင်ခန်းနံရံနဲ့ ပစ်စတင် (Piston) မှာတပ်ဆင်ထားတဲ့ Rings တွေပါ။ ဒီ Piston Rings တွေက မီးလောင်ခန်းနံရံကို တွန်းကန်ထားပြီး မီးလောင်ခန်းအတွင်းက စွမ်းအား Power တွေ အပြင်မထွက်အောင် ထိန်းပေးထားပါတယ်။

(ဒါကြောင့် အင်ဂျင်သက်တမ်းကြာလာလို့ ဒီ Piston Rings တွေပွတ်တိုက်မှုများပြီး ပွန်းစားလာပြီဆိုတာနဲ့ အင်ဂျင်ပါဝါကျလာရတာပါပဲ၊ စာကြွင်း)

ဒါပေမဲ့ မီးလောင်ခန်းအတွင်းက ဖိကျစ်ထားတဲ့ ဆီလေအရောအနှောကို မီးရှို့လိုက်တဲ့အခါ ဖြစ်ပေါ်လာတဲ့ ပေါက်ကွဲမှုက အင်မတန်ပြင်းထန်ပါတယ်။ ဒီလိုပြင်းထန်လှတဲ့အတွက် ဘယ်အမျိုးအစားကောင်းတဲ့ Piston Rings တွေကမှ ဒီပေါက်ကွဲမှု ပါဝါတွေကို 100% လုံခြုံအောင် ထိန်းထားနိုင်စွမ်းမရှိပါဘူး။ ဒီမှာပဲ Power Stroke ကနေ ဖြစ်ပေါ်လာတဲ့ တွန်းအားဖိအားတွေက Piston Rings ကနေလွတ်ထွက်လာတာကို အခြေပြုပြီး Blow-By လို့ ခေါ်ဝေါ်ကြတာမျိုးပါ။

ဒီလွတ်ထွက်လာတဲ့ တွန်းအားဖိအားတွေက အင်ဂျင်ရဲ့ အင်ဂျင်ဝိုင်ဆီကန်လို့ခေါ်တဲ့ Crankcase ထဲမှာ ထပ်ကာထပ်ကာ သွားစုနေပါတော့တယ်။ ဒီလိုနဲ့ အင်ဂျင်ရဲ့အတွင်းပိုင်းမှာ မလိုအပ်တဲ့ ဖိအားတွန်းအား Pressure တွေဖြစ်ပေါ်လာတာပါပဲ။

၁။ PCV (Positive Crankcase Ventilation Valve) ပိတ်တာ

PCV ဆိုတာ Engine Head မှာရှိတဲ့ Tappet အဖုံးရယ် Inlet လေဝင်ပေါက်ရယ်ကို ချိတ်ဆက်ပေးထားတဲ့ တစ်ဖက်တည်းကိုပဲ စီးဆင်းနိုင်တဲ့ One Way Valve လေးတစ်ခုပါ။ သူရဲ့ အဓိက လုပ်ဆောင်ချက်က အင်ဂျင်အတွင်းပိုင်းမှာရှိတဲ့ Piston တွေဖိသိပ်တဲ့အချိန် Piston တွေကို ကျော်ထွက်ပြီး အင်ဂျင်အတွင်းမှာပါ တည်ဆောက်နေတဲ့ အတွင်းပိုင်းဖိအား Blow-By ဆိုတဲ့ ဖိအားမြင့် Gas တွေကို လေထုထဲမရောက်စေဘဲ အင်ဂျင် Inlet ထဲရောက်အောင် ပြန်လည်ထည့်ပေးတဲ့အလုပ်ကို လုပ်ဆောင်ပေးပါတယ်။

ဒီလိုဖိအားတွေကို အင်ဂျင်မီးလောင်ခန်းထဲ ပြန်ရောက်အောင် လုပ်ပေးရတဲ့ PCV Valve လေးက အင်ဂျင်အတွင်းပိုင်း အခိုးအငွေ့တွေကနေပါလာတဲ့ ဆီတွေ၊ အမှုန်အမွှားတွေ၊ မီးခိုးမှိုင်းတွေကြောင့် ပိတ်ဆို့ကုန်တယ်ဆိုရင် အင်ဂျင်အတွင်းမှာ ဖိအားမြင့်တဲ့ Blow-By Gases တွေ စုဝေးလာတတ်ပါတယ်။ ဒီလို စုဝေးလာတာကြောင့် ဒီ Blow-By Gases တွေ အင်ဂျင်အတွင်းပိုင်းက နေရာအနှံ့အပြားဆီကို ဖိအားတွေ သက်ရောက်စေပြီး အင်ဂျင်ဝိုင်တွေကို နေရာအသီးသီးကနေ ကန်ထွက်စေပါတယ်။ အထူးသဖြင့် အင်ဂျင်ဝိုင်တွေကို တားဆီးထားတဲ့ Engine Oil Seal တွေကနေ တစ်ဆင့်ယိုစိမ့်ထွက်တယ်။ အဲလိုယိုစိမ့်ထွက်စရာ မရှိဘူးဆိုရင် Inlet ပေါက်နေ တစ်ဆင့် အင်ဂျင်ဝိုင်တွေကို မှုတ်ထုတ်တတ်ပါတယ်။ ဒါကြောင့် အဲဒီ Inlet ကနေ တစ်ဆင့် ကျနော်တို့ရဲ့ လေစစ် (Air Filter) အထိကို အင်ဂျင်ဝိုင်အစအနတွေ ရောက်လာရတာပါပဲ။

၂။ Piston Rings တွေ မကောင်းတာ

အပေါ်မှာ ရှင်းပြခဲ့သလိုပဲ Piston Ring ဆိုတာကလည်း ကားအင်ဂျင်ရဲ့ မီးလောင်ခန်းအတွင်းမှာ ဆီနဲ့ လေတွေကို ဖိသိပ်ပြီး မီးလောင်ပေါက်ကွဲဖို့ လိုအပ်တဲ့အခြေအနေရောက်အောင် ဖိအားတွေပေးရတဲ့အရာပါ။ ဒီလို မီးလောင်ခန်းအတွင်းဖိအားတွေ ပေးရတဲ့ Piston Rings တွေက မီးလောင်ခန်းနံရံတွေနဲ့ ပွတ်တိုက်ပါများလာတဲ့အခါ ပွန်းစားမှုတွေဖြစ်ပေါ်လာပြီး မီးလောင်ပေါက်ကွဲလိုက်တဲ့အချိန်မှာ ဖြစ်ပေါ်လာတဲ့ မီးလောင်ခန်းအတွင်းကဖိအားတွေကို အကုန်မထိန်းသိမ်းနိုင်တော့ဘဲ အဲဒီဖိအားတွေက မီးလောင်ခန်းကနေ တစ်ဆင့် အင်ဂျင်ရဲ့ အင်ဂျင်ဝိုင်ကန်အထဲထိရောက်ပြီး အတွင်းပိုင်းမှာ ဖိအားတည်ဆောက်မှုတွေဖြစ်ပေါ်ပါတယ်။ ပုံမှန်အခြေအနေတွေမှာလည်း ဒီလိုမီးလောင်ခန်းထဲက ဖိအားတွေကျော်ထွက်ပြီး အင်ဂျင်ဝိုင်ကန် ထဲရောက်ပါတယ်။ ပုံမှန်အခြေအနေမှာရောက်လာတဲ့ မီးလောင်ခန်းထဲက ဖိအားတွေက အပေါ်မှာပြောခဲ့တဲ့ PCV ကနေတစ်ဆင့် မီးလောင်ခန်းထဲပြန်ရောက်ပြီး ပြန်လည်လောင်ကျွမ်းစေတာမို့ ဘာပြဿနာမှ မရှိပါဘူး။ သို့ပေမဲ့ Piston Ring တွေ ပွန်းစားကုန်လို့ Ringsတွေကုန်တဲ့အခါမှာတော့ မီးလောင်ခန်းထဲက ဖိအားတွေဟာ ပိုမိုများပြားလာပြီး အင်ဂျင်အတွင်းပိုင်းနေရာအနှံ့ တွန်းကန်ကုန်တာမို့ PCV Valve တစ်ခုတည်းနဲ့ မထိန်းချုပ်နိုင်တော့ပါဘူး။ ဒီလိုနဲ့ အင်ဂျင် Inlet ထဲထိရောက်ပြီး လေစစ် (Air Filter) မှာ အင်ဂျင်ဝိုင်တွေ ရောက်ကုန်ရတာပါပဲ။

ကျနော်တို့ ကားတွေ အရောင်းအဝယ်လုပ်ရင် ကားစက်နှိုးထားချိန် ကားအင်ဂျင်ဝိုင်တိုင်းတဲ့ ဂိတ်တံလေးကို နှုတ်ပြီး အင်ဂျင်မှုတ်မမှုတ်၊ အငွေ့တွေထွက်မထွက် ကြည့်တာလည်း ဒီသဘောပါပဲ။ ဒီဇယ် အင်ဂျင်တွေမှာဆိုရင် Compression ဖိအားပိုများတာမို့ အင်ဂျင်ဝိုင်ဂိတ်တံကနေ အငွေ့ထွက်တာ သိသိသာသာ မြင်တွေ့ရပါတယ်။ ဒီလို Rings တွေကျသွားလို့ ပွန်းစားသွားလို့ အင်ဂျင် အငွေ့လိုက်နေပြီဆိုရင်တော့ လေစစ် (Air Filter) မှာ အင်ဂျင်ဝိုင်အစအနတွေ ကျိန်းသေမြင် တွေ့ရမှာဖြစ်ပါတယ်။

၃။ Oil Passages ဆိုတဲ့ လမ်းကြောင်းတွေ ပိတ်ဆို့တာ

Oil Passage ဆိုတဲ့ အင်ဂျင်ဝိုင်သွားရာ လမ်းကြောင်းတွေ ပိတ်ဆို့ရင်လည်း လေစစ် (Air Filter) မှာ အင်ဂျင်ဝိုင်နဲ့ အခြား ဆီအစအနတွေ မြင်တွေ့ရတတ်ပါတယ်။ အထူးသဖြင့် အင်ဂျင်ဝိုင်ဂရိတ်မမှန်တာတွေသုံးတဲ့ကားတွေ၊ အင်ဂျင်ဝိုင်အမျိုးအစားညံ့တာတွေသုံးတဲ့ကားတွေမှာ Oil Sludge ဆိုတဲ့ ဆီမိလ္လာလို ကြေးပိတ်ဆို့တာတွေ ဖြစ်ပေါ်တတ်ပါတယ်။

ဒီလိုပိတ်ဆို့ကုန်တဲ့အတွက် အင်ဂျင်ခန်းအတွင်းမှာဖြစ်ပေါ်နေတဲ့ Blow-By Gases တွေက PCV Valve ဆီကို ကောင်းကောင်းမွန်မွန်မရောက်နိုင်တော့ဘဲ အင်ဂျင်အတွင်းပိုင်းထဲမှာပဲ ဖိအားတွေဖြစ်ပေါ်ကုန်ပါတယ်။ ဒီလို ဖိအားတွေများများစုမိတဲ့အခါ အကုန်တွန်းကန်ထွက်လာပြီး အင်ဂျင်ရဲ့ လေဝင်လမ်းကြောင်းတွေထိပါရောက်ရှိပြီး Air Filter (လေစစ်) တွေကို အင်ဂျင်ဝိုင် အစအနတွေ၊ ဆီအစအနတွေ စွန်းထင်းကုန်စေတာပါပဲ။

ဒီအချက်တွေက အင်ဂျင်အတွင်းပိုင်းမှာ မလိုလားအပ်တဲ့ဖိအား Blow-By Gases တွေနဲ့ဆက်စပ်ပြီး လေစစ် (Air Filter) အထိ အင်ဂျင်ဝိုင်အစအနတွေရောက်စေရတဲ့ အကြောင်းအချက်တွေပါ။ ဒီလို လေစစ်မှာ အင်ဂျင်ဝိုင်အစအနေတွေ မြင်တွေ့ရတာဟာ ပုံမှန်အခြေအနေမဟုတ်ဘဲ ကားအင်ဂျင်ပိုင်းဆိုင်ရာတွေ တစ်ခုခု ချို့ယွင်းနေတာမို့ ကြီးကြီးမားမား ပျက်စီးဆုံးရှုံးမှုမဖြစ်ခင် အမြန်ဆုံးပြုပြင်ထိန်းသိမ်းရမှာဖြစ်ကြောင်း ဆွေးနွေးတင်ပြပေးလိုက်ရပါတယ်။

စာဖတ်သူမိတ်ဆွေ ညီအစ်ကိုမောင်နှမများအားလုံး နည်းပညာ ဗဟုသုတ ကြွယ်ဝကြပါစေ။

Author