ပင်မစာမျက်နှာ
ကားသတင်းများ
ကမ္ဘာပေါ်တွင် ၂ စင်းတည်းသာရှိသော အရှားပါးဆုံးပြိုင်ကား Koenigsegg CCXR Trevita ၊ ဟဲဗီးဝိတ်ချန်ပီယံ ဖလွိုက် မေဝဲသာက ၁ စင်းပိုင်ဆိုင်ခဲ့

ကမ္ဘာပေါ်တွင် ၂ စင်းတည်းသာရှိသော အရှားပါးဆုံးပြိုင်ကား Koenigsegg CCXR Trevita ၊ ဟဲဗီးဝိတ်ချန်ပီယံ ဖလွိုက် မေဝဲသာက ၁ စင်းပိုင်ဆိုင်ခဲ့

215 views

ကန်ဒေါ်လာ သန်း ၄၅၀ ခန့် ချမ်းသာကြွယ်ဝသည်ဟု ခန့်မှန်းရသော ဟဲဗီးဝိတ်ချန်ပီယံဟောင်း ဖလွိုက် မေဝဲသာသည် ၎င်းအလိုရှိသမျှ ဝယ်ယူခဲ့သည်ချည်းပင်။

မိုးပျံနန်းတော်ကြီးသဖွယ် တင်စားရသော ဒေါ်လာ သန်း ၅၀ တန်ကြေးရှိ ကိုယ်ပိုင်ဂျက်လေယာဉ်ကြီးမှသည် ဒေါ်လာ ၁ ဒသမ ၄ သန်းတန် စိန်စီသော နာရီအထိ မေဝဲသာက သူအလိုရှိသမျှ ငွေကြေးသုံးစွဲရန် လက်မတွန့်ခဲ့။

မေဝဲသာသည် အထူးသဖြင့် မော်တော်ကားများအတွက် နှစ်ပေါင်းများစွာ ကာလအတွင်း ငွေကြေးများစွာ သုံးစွဲခဲ့သည်။

မေဝဲသာတွင် Ferrari များ ၊ Lamborghini များ ၊ Rolls Royce များ ပိုင်ဆိုင်ထားသော်လည်း ၎င်းတို့အနက် အထူးခြားဆုံးကား တစ်စင်းရှိနေသည်။

ထိုကားမှာ Koenigsegg CCXR Trevita ဖြစ်ပြီး ကမ္ဘာပေါ်တွင် အမြန်ဆုံးကားများ၌ တစ်စင်းအပါအဝင်ဖြစ်ကာ 400 kmph (သို့မဟုတ်) ၂၄၈ mph အမြန်နှုန်းဖြင့် မောင်းနှင်နိုင်သည်။

4.7-Liter V8 အင်ဂျင်တပ်ဆင်ထားပြီး မြင်းကောင်ရေ ၁၀၁၈ အားထွက်ကာ ရုန်းအား ၇၈၁ lb-ft ရှိသည်။

100 kmph ကို ၃ ဒသမ ၁ စက္ကန့်အတွင်း ရရှိနိုင်သည်။

ဤကား၏ အထူးခြားဆုံးအချက်မှာ ၂ စင်းတည်းသာ ထုတ်လုပ်ထားခြင်း ဖြစ်သည်။

ကား၏ ကိုယ်ထည်ကို ကာဗွန်ဖိုက်ဘာဖြင့် ပြုလုပ်ထားရာ နေရောင်ခြည်အောက်တွင်ဆိုလျှင် စိန်ပွင့် သန်းပေါင်းများစွာ တဖိတ်ဖိတ်လက်နေသကဲ့သို့ ရှိသည်။

မူလက ၃ စင်းထုတ်လုပ်ရန် ရည်ရွယ်ခဲ့သည်။

ကားမော်ဒယ်အမည်တွင် ပါဝင်သော Trevita မှာ ဆွီဒင်ဘာသာအားဖြင့် အဖြူ ၃ ဖော်ဟု အဓိပ္ပာယ်ရသည်။

ထိုသို့ ရည်ရွယ်ခဲ့သော်လည်း အနက်ရောင်ကာဗွန်ကို ငွေဖြူရောင်အဖြစ် ပြောင်းလဲရခြင်းမှာ များစွာခက်ခဲ ရှုပ်ထွေးလှသောကြောင့် ၂ စင်းတည်းသာ ထုတ်လုပ်ခဲ့ခြင်း ဖြစ်သည်။