နိုင်ငံတကာ ဈေးကွက်အတွင်းကို ဝင်ရောက်နေရာယူဖို့ရှိနေတဲ့ လေမဲ့တာယာများ

0

Full article

လေမဲ့တာယာလို့ခေါ်တဲ့ ‌မော်တော်ကားတာယာအမျိုးအစားတွေနဲ့ပတ်သက်တဲ့ သတင်းတွေ၊ ခန့်မှန်းချက်တွေအများအပြား မကြာသေးခင်က ထွက်ပေါ်လာခဲ့ပါတယ်။ အဲဒီအထဲမှာ သေချာတဲ့သတင်းတစ်ရပ်ကတော့ ပြင်သစ်အခြေစိုက် မော်တော်ကားတာယာထုတ်လုပ်ရေးကုမ္ပဏီ Michelin ဟာ Tweel လို့ခေါ်တဲ့ လေမဲ့တာယာနည်းပညာသစ်ကို အောင်မြင်စွာစမ်းသပ်‌ဖော်ဆောင်ထားခဲ့ပြီဆိုတာပဲဖြစ်ပါတယ်။ တစ်ချိန်တည်းမှာပဲ အဓိက ပြိုင်ဘက်ကုမ္ပဏီဖြစ်တဲ့ ဂျပန်အခြေစိုက် Bridgestone ကလည်း Tweel ကို အမီလိုက်ဖို့သာမက ‌ဈေးကွက်အတွင်းမှာ အနိုင်ရမယ့် လေမဲ့တာယာအမျိုးအစားသစ်‌ကို စမ်းသပ်ဖော်ဆောင်နေပြီဖြစ်ကြောင်း သိရပါတယ်။

Automotive News ဝက်ဘ်ဆိုက်ရဲ့အဆိုအရ Bridgestone ကုမ္ပဏီဟာ လေထည့်သွင်းအသုံးပြုစရာမလိုတဲ့ ကားတာယာအမျိုးအစားသစ်ကို စမ်းသပ်တီထွင်နိုင်ခဲ့ပြီး ‌ဈေးကွက်အတွင်း စတင်ရောင်းချနိုင်ဖို့ နီးစပ်နေပြီလို့ သိရပါတယ်။ ကားတာယာအတွင်းမှာ လေကို ဖိအားနဲ့ထည့်သွင်းထားမယ့်အစား ပင့်ကူအိမ်သဏ္ဍာန်ဖန်တီးထားတဲ့ အပူခံပလတ်စတစ်တွေနဲ့ အလယ်အူကြောင်းအဖြစ် ကျားကန်တည်ဆောက်ထားတာပဲဖြစ်ပါတယ်။ Bridgestone ရဲ့လေမဲ့တာယာတွေဟာ အလေးချိန်ဖိအား ပေါင် ၅,၀၀၀ အထိ ခံနိုင်ပြီး လေမပါတဲ့အတွက် လေပေါင်လျော့နည်းတာမျိုး၊ တာယာပွင့်ထွက်တာမျိုးလည်း မဖြစ်နိုင်တော့ပါဘူး။

ဒီလိုအားသာချက်တွေကြောင့်လဲ Bridgestone ကုမ္ပဏီဟာ ၎င်းတို့ရဲ့လေမဲ့တာယာတွေကို အဝေးပြေးကုန်တင်ကားကြီးတွေ၊ Truck ကားကြီးတွေမှာ တတ်နိုင်သမျှအမြန်ဆုံးတပ်ဆင်အသုံးပြုနိုင်ဖို့ ကြိုးပမ်းနေပြီဖြစ်ပါတယ်။ စစ်တမ်းတွေအရ အဝေးပြေး Truck ကားတွေဟာ မိုင်ပေါင်း ၈,၀၀၀ ခရီးရောက်တိုင်း လေပေါင်နဲ့ပတ်သက်တဲ့ ကားတာယာပြဿနာကို ကြုံကြရတယ်လို့ သိရပါတယ်။ ဒီအတွက် ကုန်ပစ္စည်းသယ်ယူပို့ဆောင်ရေးကုမ္ပဏီတွေအနေနဲ့ အချိန်နှောင့်နှေးရသလို ငွေကုန်ကြေးကျလည်း ပိုများရပါတယ်။ အသစ်ထွက်ရှိလာမယ့် လေမဲ့တာယာတွေဟာ လေဖိအားထည့်သွင်းအသုံးပြုရတဲ့ သာမန်တာယာတွေထက်ပိုပြီး စျေးကြီးမယ်ဆိုပေမဲ့ နောက်ဆက်တွဲပြဿနာတွေကင်းဝေးတာကြောင့် ရေရှည်အတွက် တွက်ချေကိုက်မယ့်ထုတ်ကုန်တွေဖြစ်လာပါလိမ့်မယ်။

ဒါပေမဲ့ အထက်ကဆိုခဲ့သလို Bridgestone ကုမ္ပဏီဟာ လေမဲ့တာယာကို ဈေးကွက်မှာ စတင်မိတ်ဆက်ဖို့ကြိုးစားရာမှာ ဖောက်သည်အမျိုးအစားကို ကြိုတင်ရွေးချယ်ခဲ့ပြီးပါပြီ။ သာမန်အိမ်စီးကားအမျိုးအစားတွေကို ကျော်လွန်ပြီး အဝေးပြေးကုန်တင်ကားကြီး‌တွေကို ဘာကြောင့်ပစ်မှတ်ထားခဲ့ပါသလဲ။ အဖြေကတော့ ရှင်းပါတယ်။ အိမ်စီးကားငယ်တွေဟာ ဟိုက်ဝေးခရီးနှင်တာမျိုးနည်းသလို အချိန်ပြည့်မောင်းနှင်နေရတဲ့ကားမျိုးတွေမဟုတ်ပါဘူး။ အဲဒီအတွက် တာယာပြဿနာဖြစ်လာခဲ့ရင်လည်း လဲလှယ်တပ်ဆင်ဖို့ အချိန်ကောင်းကောင်းရပါတယ်။ ဟိုက်ဝေးခရီးစဉ်တွေ ဆက်တိုက်ထွက်ပြီး ကုန်ပစ္စည်းတွေကို အချိန်မီသယ်ယူပို့ဆောင်ပေးနေရတဲ့ ကုန်တင် Truck ကားကြီးတွေမှာတော့ တာယာနဲ့ပတ်သက်တဲ့ပြဿနာကို အမြဲလိုလိုကြုံတွေ့နေရပါတယ်။ ဒါကြောင့် ဒီလိုကားကြီးတွေကို ကနဦး ပစ်မှတ်ထားလာတဲ့ Bridgestone ရဲ့ စျေးကွက်ရှာဖွေရေးနည်းဗျူဟာ က အမြော်အမြင်ရှိရာရောက်နေတယ်လို့တောင် ချီးကျူးချင်စရာပါ။

နောက်ထပ် Bridgestone ရဲ့ လေမဲ့တာယာတပ်ဆင်သွားမယ့် ယာဉ်အမျိုးအစားတစ်ခုကတော့ စက်ဘီးတွေမှာပဲဖြစ်ပါတယ်။ ယခုနှစ်မှာကျင်းပမယ့် တိုကျိုအိုလံပစ်ပြိုင်ပွဲမှာ Bridgestone ရဲ့ လေမဲ့တာယာအသုံးပြုထားတဲ့ စက်ဘီးတွေကို တွေ့မြင်ကြရဖို့ရှိပါတယ်။ အိုလံပစ်ပြိုင်ပွဲဧရိယာတဝိုက်မှာ လွယ်လင့်တကူစီးနင်းအသုံးပြုလို့ရတဲ့ စက်ဘီးတွေထားရှိသွားမှာဖြစ်ပြီး Bridgestone က ၎င်းတို့ရဲ့လေမဲ့တာယာကို နည်းဗျူဟာကျကျမိတ်ဆက်ပြသဖို့ စီစဉ်ထားတာလည်း ဖြစ်ပါတယ်။ လမ်းမတွေပေါ်မှာ ကြုံတွေ့ရတဲ့ထိခိုက်မှုတွေကိုခံနိုင်ပြီး တာယာပေါက်ကွဲပွင့်ထွက်တဲ့ပြဿနာကင်းဝေးသွားမယ့်ခံစားမှုကို Bridgestone က လက်တွေ့ပေးအပ်ဖို့ ကြိုးစားနေတာလည်း ဖြစ်ပါတယ်။

တစ်ချိန်တည်းမှာ Michelin ကုမ္ပဏီရဲ့ Tweel လို့ခေါ်တဲ့ လေမဲ့တာယာနည်းပညာအကြောင်းကိုလည်း လေ့လာကြည့်သင့်ပါတယ်။ Tweel နည်းပညာကို ၂၀၀၅ ခုနှစ်ကတည်းက Michelin ကုမ္ပဏီက စတင်မိတ်ဆက်ကြေညာခဲ့ပြီး Tyre နဲ့ Wheel ဆိုတဲ့ စကားလုံးနှစ်လုံးကို ပေါင်းစပ်နာမည်ပေးထားခြင်းလည်း ဖြစ်ပါတယ်။ အမှန်တကယ်လည်း Tweel ဟာ လေမဲ့တာယာသက်သက်မဟုတ်ပါဘူး။ လေဖိအားထည့်သွင်းအသုံးပြုထားခြင်းမရှိတဲ့ ကားဘီးခွေတစ်ခုလုံးကို ခေါ်ဝေါ်ခြင်းဖြစ်ပါတယ်။ အတွင်းပိုင်းဘီးခွေနဲ့ ပြင်ပတာယာမျက်နှာပြင်ရဲ့ကြားမှာ ပိုလီယူသိမ်းဒြပ်ပစ္စည်းတွေနဲ့ပြုလုပ်ထားတဲ့ ပျော့ပျောင်းတဲ့ စပုတ်တိုင် (spoke) သဖွယ်ထောက်တိုင်တွေပါဝင်ပါတယ်။ ဒီထောက်တိုင်တွေကပဲ လေပေါင်ဖိအားရဲ့တာဝန်ကို အစားထိုးထမ်းဆောင်ပြီး ဘီးလုံးတွေသွက်လက်မြန်ဆန်စွာလည်ပတ်ဖို့ ထောက်ပံ့ပေးနိုင်မှာပဲဖြစ်ပါတယ်။ တစ်နည်းပြောရရင်တော့ Michelin ရဲ့ Tweel ဘီးလုံးတွေဟာ အရွယ်အစားကြီးကြီးဖန်တီးထားတဲ့ စက်ဘီးခွေတွေနဲ့ သွားပြီးပုံစံတူနေပါတယ်။

Tweel ဘီးခွေတွေကို လမ်းမပေါ်လှိမ့်မောင်းလိုက်ရင်ပဲ ကျင်းတွေ၊ ချိုင့်တွေ၊ အဖုအထစ်တွေရဲ့ ထိခိုက်မှုကို ပျော့ပျောင်းပြီး ဖိအားဒဏ်ခံနိုင်တဲ့ ပိုလီယူသိမ်းထောက်တိုင်တွေက ထိန်းထားပေးမှာပဲဖြစ်ပါတယ်။ ဒါကြောင့် သာမန်အတိုင်း လေထိုးအသုံးပြုရတဲ့ တာယာဘီးခွေတွေရဲ့ တုန့်ပြန်မှုနဲ့ အနီးစပ်ဆုံးတူညီနေမှာပါလိမ့်မယ်။ Michelin ရဲ့အဆိုအရ စမ်းသပ်ဆဲ Tweel ဘီးခွေတွေကို Audi A4 မော်တော်ကားမှာ စမ်းသပ်တပ်ဆင်အသုံးပြုလိုက်တဲ့အခါ သာမန်သမားရိုးကျကားတာယာတွေရဲ့ တောင့်တင်းမာကျောမှုထက် ၅ ဆပိုပြီး မာကျောနေတယ်လို့သိရပါတယ်။ ဒါကြောင့် Tweel နဲ့ ပတ်သက်ပြီး အဓိက ချိန်ညှိရမှာကတော့ ထောက်တိုင်တွေရဲ့ လိုက်လျောညီထွေတုန့်ပြန်မှုပဲဖြစ်ပါတယ်။ သာမန်လေထိုးတာယာတွေနဲ့မခြား တုန့်ပြန်မှုကောင်းမွန်မှသာ အသုံးပြုတဲ့ကားရဲ့ လောင်စာဆီသုံးစွဲမှုကို ချွေတာရာရောက်ပါလိမ့်မယ်။ ဘယ်လိုပဲဖြစ်ဖြစ်၊ လေထိုးစရာမလိုတဲ့၊ လေဖိအားအသုံးမပြုတဲ့ Airless Tyre တွေကတော့ ဈေးကွက်အဝင် လမ်းခုလတ်ကို‌ရောက်ရှိနေပါပြီ။ မျှော်လင့်ထားတဲ့အတိုင်း အားသာချက်တွေနဲ့အတူ အသုံးတည့်နိုင်မှာလားဆိုတာကတော့ စောင့်ကြည့်ရပါလိမ့်မယ်။

REF:

Author